धुळे : साक्री तालुक्यामध्ये अक्कलपाडा धरण क्षेत्रात गेल्या काही दिवसांपासून होत असलेल्या पावसामुळे धारणामधून सध्या विसर्ग सुरू आहे. यामुळे पांजरा नदीला मोठा पुर आला असून, नदीवरील तीन पुल वाहतुकीसाठी बंद करण्यात आले आहेत. (dhule-news-Discharge-from-Akkalpada-dam-Panjra-river-traffic-closed-on-three-bridges)

धुळे जिल्‍ह्यात दोन दिवस झालेल्‍या पावसामुळे सर्व नदी नाल्‍यांना पुर आला आहे. यात साक्री तालुक्‍यातील अक्‍कलपाडा धरण फुल्‍ल भरल्‍याने धरणातून विसर्ग केला जात आहे. यामुळे पांजरा नदीमध्ये धरणाचे पाणी सोडण्यात आल्याने नदी दुथडी भरुन वाहू लागली आहे. त्याच बरोबर धुळे शहरातून ही पांजरा नदी वाहत असल्यामुळे शहरातील तीन पूल प्रशासनातर्फे प्रवाशांसाठी बंद करण्यात आली आहे.

पथक तैनात

कालिकामाता पूला लगत पाणी पोहोचले असल्यामुळे प्रशासनातर्फे खबरदारीचा उपाय म्हणून या ठिकाणी अग्निशमन विभागाचे पथक तैनात करण्यात आले आहे. कुठल्याही प्रकारची अनुचित घटना घडू नये यासाठी प्रशासनातर्फे काळजी घेतली जात आहे. नागरिकांनी पांजरा नदी पात्रात जाऊ नये; असे आवाहन प्रशासनातर्फे नागरिकांना करण्यात आले आहे.