धुळे : धुळ्यातील चिमुकल्यांनी लाडक्या बाप्पाला घरात पाण्याच्या टपमध्ये बुडवूनच विसर्जित करीत प्रशासनाच्या नियमांची पायमल्ली करणाऱ्या भक्तांसमोर आदर्श निर्माण केला आहे. (dhule-news-child-ganesh-visarjan-home-in-shalu-soil-bappa)

लाडक्या बाप्पाला विसर्जित करताना पाण्याचे प्रदूषण टाळण्यासाठी प्रशासनातर्फे शेततळ्यांचे आयोजन करून नागरिकांना वेळोवेळी आवाहन करून देखील नागरिक प्रशासनाच्या आव्हानाकडे दुर्लक्ष करत नदीत किंवा विहिरींमध्ये विसर्जन करत असतात. परंतु धुळे शहरातील देवेन माळी व हर्षदा माळी या दोन चिमुकल्यांनी लाडक्या बाप्पाला घरातच पाण्याच्या टपमध्ये बुडूनच विसर्जित केले आहे.

चिमुकल्यांनी प्रशासनाच्या आव्हानाला प्रतिसाद देत व नियमांची पायमल्ली करणाऱ्या भक्तांसमोर आदर्श निर्माण करीत आपल्या घरी आणलेल्या बाप्पाच्या शाडू मातीच्या मूर्तीचे घरातच विसर्जन केले आहे. या चिमुकल्यांचे परिसरातील नागरिकांतर्फे कौतुक करण्यात येत आहे.