धुळे : रस्त्याने पायी चालत असलेल्या महिलेच्या गळ्यातील सोनसाखळी ओरबाडून चोरटा पसार झाल्याची घटना घडली होती. याचा पोलिसांनी तपास करत चेन चोरट्याच्या स्थानिक गुन्हे अन्वेषण विभागाच्या पथकाने मुद्देमालासकट मुसक्या आवळल्या आहेत.  

धुळे (Dhule) शहरातील देवपूर परिसरातील नकाने रोड वरून आपल्या घराकडे पायी जात असलेल्या महिलेची एका चोरट्याने मागून येऊन अचानकपणे गळ्यातील चेन ओरबाडून पोबारा केल्याची घटना बुधवारी संध्याकाळी घडली होती. या संदर्भात संबंधित महिलेने पोलिसांत जाऊन तक्रार दिली होती. यानंतर स्थानिक गुन्हे अन्वेषण विभागाच्या पथकाने (Dhule LCB) संबंधित परिसरामध्ये या चोरट्याचा शोध घेतला असता, संबंधित चोरटा हा पोलिसांच्या हाती लागला आहे. 

२७ ग्रॅमची चैन केली हस्तगत  
पोलिसांनी (Police) या चोरट्याकडून चोरलेली सोन्याची चेन हस्तगत केली. ही सोन्याची चेन जवळपास २७ ग्रॅम वजनाची असून तिची बाजारामध्ये दोन लाखांहून अधिकची किंमत मानली जात आहे. स्थानिक गुन्हे अन्वेषण विभागाच्या पथकातर्फे या संदर्भात पुढील कारवाई केली जात आहे.