बालाजी सुरवसे 

धाराशिव : आरटीई अंतर्गत खाजगी शाळांमधील प्रवेश प्रक्रिया रखडली आहे. यामुळे विद्यार्थ्यांचे नुकसान होत आहे. या मुद्द्यावरून धाराशिवमध्ये शिवसेना ठाकरे गट आक्रमक झाला असुन जिल्हाधिकारी कार्यालयासमोर शालेय शिक्षणमंत्री दिपक केसकर यांचे पोस्टर उलटे टांगत आंदोलन करण्यात आले.  

राज्य सरकारने खाजगी शाळांमध्ये आरटीई प्रवेश प्रक्रिया अंतर्गत २५ टक्के राखीव जागा संदर्भात घेतलेल्या निर्णयाला न्यायालयाने स्थगिती दिली आहे. मात्र राज्य सरकार अद्यापपर्यंत हा आदेश मागे घेत नाही. त्यामुळे २५ टक्के राखीव जागेवरील प्रवेश प्रक्रिया रखडली आहे. शाळा सुरु होऊन पंधरा दिवसांचा कालावधी उलटला असून अजूनपर्यंत या अंतर्गत प्रवेश मिळत नसल्याने याचा विद्यार्थ्यांना फटका बसत आहे.  

राज्य सरकार विरोधात घोषणाबाजी 

या निर्णयाच्या विरोधात ठाकरे गटाच्या शिवसैनिकांनी जिल्हाधिकारी यांना निवेदन देवुन जिल्हाधिकारी कार्यालयासमोर आंदोलन केले. तसेच शालेय शिक्षणमंत्री दिपक केसकरांचे पोस्टर उलटे टांगत ठाकरे गटाने आंदोलन केले. यावेळी राज्य सरकार व शिक्षण मंञी यांच्या विरोधात जोरदार घोषणाबाजी करण्यात आली.