बालाजी सुरवसे

Dharashiv News :

मनोज जरांगे पाटील  यांच्या उपोषणाला पाठींबा देण्यासाठी धाराशिव जिल्हाधिकारी कार्यालयासमोर अक्षय नाईकवाडी या तरूणासह काहींनी आमरण उपोषण सुरू केले आहे. या उपोषणाचा आज चौथा दिवस आहे. उपोषणकर्त्यांची आज आरोग्यमंत्री डॉ. तानाजी सावंत यांनी भेट घेतली.

तानाजी सावंत उपोषणस्थळी आल्यानंतर मराठा समाजाच्या तरुणांची जोरदार घोषणाबाजी सुरु केली.  मराठा आरक्षणाचा ठोस निर्णय न झाल्यास राजीनामा देणार का? असा सवाल काहींनी सावंत यांना विचारला.

त्यामुळे काहीसा गोंधळ त्याठिकाणी निर्माण झाला. सावंतानी राजीनामा देण्याची मागणी करत घोषणाबाजी करणाऱ्या आंदोलक अमोल जाधव यांना पोलिसांनी ताब्यात घेतलं.

यावर बोलताना तानाजी सावंत यांनी म्हटलं की, मी नेहमीच मराठा समाजासोबत राहिलो आहे. मराठा आरक्षण मिळेत नाही तोवर जीवात जीव असेपर्यंत तुमच्यासोबत राहणार आणि तुमच्यासोबत वेळ पडली तर रस्त्यावर उतरेन. (Latest Marathi News)

मनोज जरांगे पाटील यांनी औषध-पाणी घेण्यास नकार

गेल्या 14 दिवसापासून मराठा आरक्षणाच्या मागणीसाठी जालन्यातील अंतरवाली सराटी गावात मनोज जरांगे पाटील यांनी आमरण उपोषणाला सुरवात केली आहे. सरकारकडून मराठा समाजाला कुणबी प्रमाणपत्र मिळावे म्हणून वंशावळीच्या आधारे आधादेशही काढण्यात आला.

मात्र यानंतर जरांगे पाटील यांनी सरकारला चार दिवसाचा अल्टीमेटम दिला होता. हा चार दिवसाचा अल्टीमेटम संपल्यानंतर जरागे यांनी काल सकाळपासून पाणी आणि औषध उपचार घेण्यासही नकार दिला आहे.