Devendra Fadnavis on Nashik Riots : नाशिकमध्ये जाणीवपूर्वक दंगल घडवण्यात आली, दगडफेक करण्यात आल्याचा गंभीर आरोप मुख्यमंत्री देवेंद्र फडणवीस यांनी केला आहे. ते बीडमध्ये बोलत होते. यावेळी बोलताना नाशिक दंगलीमधील सहभागी असणाऱ्यांवर कडक कारवाई केली जाईल असे सांगितले.

नाशिकमध्ये कोर्टाच्या निर्णायानंतर अतिक्रमण काढण्यात येत होते. तेथील लोकांनी त्याला पाठिंबा दर्शवला होता,पण काही लोकांनी जाणीवपूर्वक विरोध केला अन् दंगल घडवून आणली असा खळबळजनक आरोप मुख्यमंत्री देवेंद्र फडणवीस यांनी केला.

देवेंद्र फडणवीस काय म्हणाले ?

नाशिकमध्ये नियोजन पद्धतीने दंगल घडवण्याचा प्रयत्न झाला आहे. न्यायालयाच्या निर्णायानंतर तेथील लोकांनी स्वत:हून अतिक्रमण काढण्यासंदर्भात पोलिसांना सांगितले होते. अतिक्रमण काढण्यासाठी त्या लोकांनी सुरूवात केली होती. पण त्याच वेळी दंगलीमध्ये दिसणाऱ्या लोकांनी जाणीवपूर्वक त्या ठिकाणी दगडफेक केली, दंगा केला. त्यामुळेच त्यांच्यावर कडक कारवाई केली जात आहे, असे देवेंद्र फडणवीस म्हणाले.

नाशिकमध्ये त्या रस्त्यावरील बॅरीकेट्स ४ दिवसानंतर हटवले -

नाशिकच्या काठे गल्ली सिग्नल परिसरातील रस्ता अखेर वाहतुकीसाठी आजपासून खुला झाला आहे. ४ दिवसानंतर पोलीसांनी रस्त्यावरील बॅरीकेट्स हटवले आहेत. काठे गल्ली सिग्नल परिसरातील अनधिकृत बांधकाम हटवण्यासाठी रस्ता बंद करण्यात आला होता. मात्र अनाधिकृत बांधकामावरील कारवाईनंतर शहरात कोणताही अनुचित न घडल्याने पोलिसांनी रस्ता वाहतुकीसाठी खुला केला आहे. दरम्यान पोलिसांनी रस्ता वाहतुकीसाठी खुला केला असला तरी देखील अनधिकृत बांधकाम परिसरात पोलिसांचा बंदोबस्त मात्र कायम आहे.

१५०० जणांविरोधात गुन्हा दाखल

नाशिकच्या काठे गल्ली सिग्नल परिसरातील अनधिकृत बांधकाम दगडफेक प्रकरणातील सर्व ३७ संशयित आरोपींना आज एकत्रित कोर्टात हजर करण्यात येणार आहे. दगडफेक प्रकरणी १५०० जणांविरोधात गुन्हा दाखल आहे. तर आत्तापर्यंत ३७ आरोपी अटकेत आहेत. संशयित आरोपींमधील महाविकास आघाडीचे तीन प्रमुख पदाधिकारी अद्यापही फरार आहेत. तर MIM पक्षाचा शहराध्यक्ष अटकेत आहे. नाशिकच्या अनधिकृत बांधकाम आणि दगडफेक प्रकरणी राजकीय कनेक्शन समोर आले आहे. न्यायालयाच्या आजच्या सुनावणीकडे लक्ष लागलेय.