Maharashtra Political News: मनसेकडून समृद्धी महामार्गावारील टोलनाक्यांवर झालेल्या तोडफोडीवरुन अभिनेत्री दीपाली सय्यद यांनी निशाणा साधला आहे.' राज्यात जेवढे मनसे कार्यकर्ते, तेवढेच रस्त्यावर खड्डे', अशी खरमरीत टीका दिपाली सय्यद यांनी केली आहे. (Latest Marathi News)

आपल्या ट्वीटर अकाउंटवर एक पोस्ट शेअर केली आहे. "मनसेच्या कार्यकर्त्यांनी टोलनाके व गाड्या फोडण्यापेक्षा खड्डे बुजवण्याची मोहिम घ्यावी, असा सल्ला दीपाली सय्यद यांनी दिला आहे. राज्यभरात जेवढे मनसेचे कार्यकर्ते तेवढेच रस्त्यावर खड्डे ! दोन दिवसाचे काम, उगाच जेलमध्ये महिना भर राहून देशाचे नुकसान आणि बाहेर स्टंटबाजी करून पन! युवा नेत्यांना घराबाहेर काढुन कामाला लावा !", अशा शब्दांत दीपाली यांनी महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांच्यावर निशाणा साधलाय.

अमित ठाकरे काही दिवसांपूर्वी उत्तर महाराष्ट्र दौऱ्यावर होते. यावेळी समृद्धी महामार्गावरून मध्यरात्री मुंबईच्या दिशेने जाताना टोलनाक्यावर त्यांचे वाहन आडवण्यात आले होते. काही मिनिटं त्यांना उभं रहावं लागलं. त्यानंतर अमित ठाकरेंच्या वाहनांचा ताफा पुढे सोडण्यात आला. ते तेथून गेल्यानंतर मनसे कार्यकर्त्यांनी आक्रमक भूमिका घेतली आणि टोलनाक्याची तोडफोड केली.

टोलनाक्याच्या तोडफोडीनंतर अमित ठाकरेंवर भाजपने देखील निशाणा साधला होता. नेहमीच रस्ते आणि टोलनाके फोडण्यापेक्षा कधीतरी ते बांधायलाही शिका अशी टीका भाजपकडून करण्यात आली होती. अमित ठाकरेंवरील या टीकेला राज ठाकरेंनी दमदार प्रत्युत्तर दिलं होतं. तुम्ही फक्त दुसऱ्यांचे पक्ष फोडण्यापेक्षा कधीतरी आपलेही पक्ष बांधायला शिका, असं राज ठाकरेंनी म्हटलं होतं. यानतंर आता दीपाली सय्यद यांच्या टीकेला काय प्रत्युत्तर मिळणार हे पाहणं महत्वाचं ठरणार आहे.