Akola News: व्यसनाधीन बापाच्या सततच्या त्रासाला कंटाळून एका अल्पवयीन मुलाने आपल्या बापाची हत्या केल्याची धक्कादायक घटना अकोल्यातील गीता नगर भागात घडली आहे. सुनील शिकारी अस मृत व्यक्तीचं नाव असून, या धक्कादायक बातमीने परिसरात खळबळ माजली आहे. (Akola News)

याबाबत पोलीस सूत्रांनी दिलेल्या माहितीनुसार सुनील शिकारी हे आपल्या परिवारासह अकोल्यात राहत होते. त्यांचा परिवार हा छत्तीसगडहून अकोल्यात झाडू तयार करून विक्री करण्याचे काम करत होता.

काल रात्री या परिवारात वाद निर्माण झाला होता. त्यानंतर आज सुद्धा पुन्हा वाद झाला. याच वादातून संतप्त मुलाने रागाच्या भरात वडिलांवर चाकूने वार केले. या हल्ल्यात सुनील शिकारी यांचा मृत्यू झाला.

दरम्यान या घटनेची माहिती मिळताच जुने शहर पोलिसांनी घटनास्थळ गाठून तपास सुरू केला. या प्रकरणी पोलिसांनी मारेकरी मुलाला आणि त्याच्या आईला ताब्यात घेतले असून पुढील चौकशी सुरू आहे. मुलाच्या आईची या घटनेत काय भूमिका आहे, हे अजूनही स्पष्ट झाले नाही. जुने शहर पोलीस घटनेचा अधिक तपास करीत आहेत. (Crime News)