Amabarnath: अंबरनाथमध्ये निर्दयी बापानेच ११ वर्षांच्या मुलाची गळा चिरून हत्या केल्याची धक्कादायक घटना घडली आहे. हत्या केल्यानंतर मुलाचा मृतदेह नाल्यात फेकत असताना नागरिकांनी या नराधमाला पकडून पोलिसांच्या हवाली केले.या घटनेने परिसरात खळबळ माजली आहे. (Latest Marathi News)

याबाबत अधिक माहिती अशी की, अंबरनाथमध्ये राहणाऱ्या आनंद गणेशन या युवकाने बुधवारी त्याच्या ११ वर्षीय मुलगा आकाश याची धारदार शस्त्राने गळा चिरून हत्या केल्याची घटना घडली आहे. हत्येनंतर मुलाचा मृतदेह एका झोळीत घेऊन नाल्यात फेकण्यासाठी तो घेऊन गेला.

मात्र याचवेळी काही स्थानिकांनी त्याला बघितले आणि पकडून पोलिसांच्या ताब्यात दिले. यानंतर अंबरनाथ पोलिसांनी घटनास्थळी धाव घेत नराधम बापाला बेड्या ठोकल्या. पोलिस उपायुक्त, सहाय्यक पोलीस आयुक्त अशा बड्या अधिकाऱ्यांनी सुद्धा घटनास्थळी भेट देत पाहणी केली.

कौटुंबिक वादातून हत्या?

कौटुंबिक वादातून वडिलांनी मुलाची हत्या केल्याची प्राथमिक माहिती समोर आली आहे. याप्रकरणी अंबरनाथ पोलिसांनी आनंद गणेशन यांच्या विरोधात हत्येचा गुन्हा दाखल करत त्याला अटक केली आहे. तसेच त्याला आज न्यायालयात हजर केलं जाणार असल्याची माहिती अंबरनाथ पोलीस स्टेशनचे पोलीस निरीक्षक जनार्दन सोनवणे यांनी दिली आहे.

दरम्यान, बापानेच पोटच्या मुलाची हत्या केल्याच्या या धक्कादायक बातमीने परिसरात खळबळ माजली आहे. (Crime News)