अमर घटारे, साम टीव्ही, प्रतिनिधी

अमरावतीमधून धक्कादायक प्रकार समोर आला आहे. अमरावतीतील काँग्रेस पक्षातील बड्या नेत्याचा मुलगा बेपत्ता झाला आहे. या तरुणाचे उद्या लग्न असल्याचे म्हटले जात आहे. अमरावतीच्या फ्रेजरपुडा पोलीस ठाण्यात तरुणाच्या वडिलांकडून तक्रार दाखल करण्यात आली आहे. बेपत्ता तरुणाला शोधण्यासाठी पोलिसांचे प्रयत्न सुरु आहेत.

मिळालेल्या माहितीनुसार, वैभव मोहोड (वयवर्ष ३०) असे बेपत्ता झालेल्या तरुणाचे नाव आहे. वैभव हा काँग्रेस पक्षाचे नेते आणि जिल्हा मध्यवर्ती सहकारी बँकेचे संचालक हरिभाऊ मोहोड यांचा मुलगा आहे. वैभव शिवाजी महाविद्यालयामध्ये लिपिक म्हणून कार्यरत आहे. त्याच उद्या लग्न होतं पण त्याआधीच तो बेपत्ता झाला.

आज (१३ मे) सकाळी सामान आणायला बाहेर जातो असे सांगत वैभव घराबाहेर पडला होता. पण बराच वेळ झाला तरीही तो घरी परतला नाही. त्यामुळे हरिभाऊ मोहोड यांनी पोलीस ठाण्यात धाव घेतली. वैभवने सकाळी एटीएममधून ४० हजार रुपये काढल्याची माहिती समोर आली आहे. या प्रकरणाचा अधिक तपास फ्रेजरपुरा पोलीस करत असून वैभव बेपत्ता झाल्याची नोंद घेतली आहे.

उद्या लग्न असलेल्या काँग्रेस नेत्याचा मुलगा बेपत्ता झाल्याने अमरावतीत खळबळ उडाली आहे. काँग्रेसचे नेते आणि जिल्हा मध्यवर्ती सहकारी बँकेचे संचालक हरिभाऊ मोहोड यांचा मुलगा वैभव मोहोड बेपत्ता झाला आहे. सामान आणायला जातो असे सांगून वैभव सकाळी घराबाहेर पडला होता. त्याने बँकेच्या खात्यातून ४० रुपये काढल्याचे म्हटले जात आहे.