उद्धव ठाकरेंना मविआचा मुख्यमंत्रीपदाचा चेहरा जाहीर करावा यासाठी ठाकरे गटाची मोठी कसरत सुरूय. मात्र तरीही काँग्रेस आणि राष्ट्रवादी उद्धव ठाकरेंना दाद द्यायला तयार नाही. आता तर ठाकरे गट थेट मुंबईतल्या जागांवर तडजोड करण्यास तयार असल्याच माहिती सूत्रांनी दिलीय. 2019 साली उद्धव ठाकरेंनी भाजपासोबत मुंबईत 19 जागा लढवल्या. मात्र आता मविआत उद्धव ठाकरेंनी 36 पैकी केवळ 21 जागांची मागणी केलीय.

म्हणजे केवळ दोन वाढीव जागांची मागणी, तर ठाकरे गटातले नेते मात्र तब्बल २८ जागा लढवण्यासाठी आग्रही आहेत. मात्र उद्धव ठाकरे जागांची तडजोड करून मुख्यमंत्रिपदाची फिल्डिंग लावत असल्याची चर्चा साम टीव्हीला सूत्रांनी दिलीय. तर दुसरीकडे मुंबईत मात्र ठाकरेंची शिवसेनाच मोठा भाऊ असल्याचं त्यांचेच मित्रपक्ष म्हणतायत.

शनिवारी महाविकास आघाडीची बैठक मुंबईत झाली, यात ठाकरेंची शिवसेनेनं 21 जागांचा प्रस्ताव, तर शरद पवारांच्या राष्ट्रवादीने 7 आणि काँग्रेसने 14 जागांचा प्रस्ताव दिलाय.

काही दिवसांपूर्वी झालेल्या महाविकास आघाडीच्या मेळाव्यातही उद्धव ठाकरेंनी मुख्यमंत्रीपदाबाबत जाहीरपणे चेहरा जाहीर करण्याची मागणी केली होती.

महायुती मुख्यमंत्री एकनाथ शिंदे यांच्या नेतृत्वात विधानसभा निवडणूक लढतेय तर महाविकास आघाडीचा अजूनही सीएमपदाचा चेहरा जाहीर करण्यात आलेला नाही. शिंदेंना थेट आव्हान द्यायचं असेल तर त्यांच्यासारखंच निवडणुकीत नेतृत्व मिळायला हवं, असा ठाकरे गटाचा आग्रह आहे. त्यामुळेच ठाकरे आता सीएमपदाच्या चेहऱ्यासाठी थेट जागांचीही तडजोड करत असल्याची चर्चा आहे. मात्र हा फॉर्म्युला तरी काँग्रेस-राष्ट्रवादीला मान्य होणार का? याकडे लक्ष आहे.