संजय सूर्यवंशी

नांदेड : जिल्हा रुग्णालयात अस्वच्छतेचा प्रश्न कायम पाहण्यास मिळत असतो. अशातच नांदेड शासकीय रुग्णालयात धक्कादायक प्रकार समोर आला आहे. या रुग्णालयातील लहान मुलांच्या आयसीसीयू वार्डात झुरळ असल्याचे दिसून आले आहे. या अशा प्रकारामुळे मुलांच्या सुरक्षेवर प्रश्नचिन्ह निर्माण होत आहे. 

नांदेडच्या शासकीय रुग्णालयात दीड वर्षांपूर्वी अचानक २४ जणांचा मृत्यू झाल्याची घटना घडली होती. त्यामुळे नांदेडचे शासकीय रुग्णालय देशभरात चर्चेत आले होते. त्यानंतर प्रशासकीय व्यवस्था स्थापन करून काही सोयी सुविधा उपलब्ध करून देण्यात आल्या होत्या. मात्र आता शासकीय रुग्णालयातील अस्वच्छतेचा धक्कादायक प्रकार पुन्हा एकदा समोर आला आहे. 

झुरळ व डासांचाही त्रास 

मुळात लहान मुलांच्या वार्डात अधिक सुरक्षा व स्वच्छता असणे आवश्यक आहे. मात्र नांदेडच्या डॉ. शंकराव चव्हाण शासकीय रुग्णालयातील लहान मुलांच्या आयसीयु वार्डमध्ये झूरळ आणि डास नवजात अर्भाकाभोवती फिरतानाचा व्हिडीओ सोशल मीडियावर व्हायरल होतं आहे. त्यामुळे नांदेडच्या आरोग्य व्यवस्थेवर पुन्हा एकदा प्रश्न चिन्ह निर्माण केले जात आहे. 

डिनचा बोलण्यास नकार 

सदरील व्हिडीओ व्हायरल झाल्याच्या नंतर रुग्णालय प्रशासनाने प्रेसनोट काढली आहे. शासकीय रुग्णालयातील व्हायरल विडियो याप्रकरणी एक समिती गठीत करण्यात आली आहे. त्याची चौकशी करण्यात येत असून दोषी आढळून आल्यास कारवाई करण्यात येणार असल्याचा उल्लेख प्रेसनोट मध्ये करण्यात आला आहे. दरम्यान रुग्णालयातील व्हायरल झालेल्या व्हिडीओ प्रकरणी रुग्णालयाचे डीन डॉ. सुधीर देशमुख यांच्याशी संपर्क साधला असता त्यानी प्रतिक्रिया देण्यास नकार दिला.