कोल्हापूरचा सांस्कृतिक वारसा आणि अनेक कलाकार घडवलेलं केशवराव भोसले नाट्यगृह दोन दिवसांपूर्वी लागलेल्या भीषण आगीत भस्मसात झालं. कित्येक पिढ्यांच्या कितीतरी आठवणी, भावना जळून खाक झाल्या आहेत. या अनपेक्षित घटनेने संपूर्ण जिल्हा आणि कलाकार हळहळले होते. मात्र आता हे नाट्यगृह पु्न्हा उभे राहणार आहे. नाट्यगृहाच्या पुनर्बांधणीसाठी राज्य सरकारने २० कोटी निधी देण्याची घोषणा केली आहे. विम्याचे 5 कोटी असे 25 कोटी रुपये देऊन पुनर्बांधणी करण्यात येणार आहे.

मुख्यमंत्री एकनाथ शिंदे यांनी आज कोल्हापूरला भेट दिली. यावेळी घडलेल्या घटनेवर दु:ख व्यक्त केलं. तसंच या घटनेची चौकशी करण्यासाठी उच्चस्तरीय चौकशी करण्यात येणार असल्याची माहिती मुख्यमंत्र्यांनी दिली.आमचं सरकार हे सर्वसामान्य जनता कलाकार यांचा विचार करणारं सरकार आहे. केशवराव भोसले नाट्यगृहाचं ज्या पद्धतीचं बांधकाम होतं. त्याचं त्याच पद्धतीचं बांधकाम होईल, यासाठी तज्ज्ञ वास्तुशास्त्रज्ञांचा सल्ला घेण्यात येणार आहे.केशवराव भोसले नाट्यगृहासोबत कोल्हापूरकरांच्या आणि कलाकारांच्या भावना जोडलेल्या आहेत. त्यामुळे त्यांच्या भावनांचा आदर करून केशवराव भोसले नाट्यगृहाची त्वरित पुनर्बांधणी व्हावी यासाठी राज्य सरकार प्रयत्न करेल, असं आश्वासन त्यांनी दिलं आहे.