Anjali Damania: भाजपा महिला मोर्चाच्या अध्यक्षा चित्रा वाघ आणि अभिनेत्री उर्फी जावेद यांच्यामध्ये गेल्या काही दिवसांपासून जोरदार वाद सुरू आहे. उर्फी जावेदच्या कपड्यांवरुन चित्रा वाघ यांनी आक्षेप घेतला होत महाराष्ट्रात असा नंगानाच चालू देणार नाही, अशी भूमिका घेतली होती. या वादात आता सामाजिक कार्यकर्त्या अंजली दमानिया यांनी उडी घेतली आहे.

अंजली दमानिया यांनी भाजपाच्या जनआक्रोश महासभेतील व्हिडिओ ट्विट करत चित्रा वाघ यांच्यावर निशाणा साधला आहे.

याबाबत अधिक माहिती अशी की, भाजपा नेत्या चित्रा वाघ( Chitra Wagh) आणि अभिनेत्री उर्फी जावेद यांच्या वादात सामाजिक कार्यकर्त्या अंजली दमानिया यांनी उडी घेतली आहे. अंजली दमानिया यांनी ट्विटरवर भाजपाच्या जनआक्रोश मोर्चातील एक व्हिडिओ ट्विट करत चित्रा वाघ यांच्यावलर टीका केली आहे.

ट्विट केलेला हा व्हिडिओ भाजपा जनआक्रोश महासभेतील असून मंचावर तरुणी डान्स करताना दिसत आहे. हा व्हिडिओ ट्विट करत अंजली दमानिया यांनी "प्रिय चित्राताई वाघ, भाजपच्या श्री रमेशबिधुरी यांची ही जन आक्रोश महासभा आहे. या बद्दल आपल्याला काय मत आहे? ह्याला आपण कुठली संस्कृती म्हणाल ? याला आपण सांस्कृतिक कार्यक्रम म्हणाल का?" अशा शब्दात चित्रा वाघ यांच्यावर निशाणा साधला आहे.

अंजली दमानिया( Anjali Damania) यांनी चित्रा वाघ यांच्यावर निशाणा साधल्याने वाद वाढण्याची चिन्हे निर्माण झाली आहेत. दरम्यान काल पत्रकार परिषद घेत चित्रा वाघ यांनी उर्फी जावेद प्रकरणात राज्य महिला आयोग पक्षपाती भूमिका घेत असल्याचे सांगितले होते. त्याचबरोबर यावेळी त्यांनी राज्य महिला आयोगाच्या अध्यक्षा रुपाली चाकणकर यांच्यावरही निशाणा साधला होता.