विधीमंडळ पावसाळी अधिवेशनाच्या अंतिम आठवडा प्रस्तावावर बोलताना राज्याचे मुख्यमंत्री देवेंद्र फडणवीस यांनी मनसे प्रमुख राज ठाकरे यांना अप्रत्यक्षपणे टोला लगावला. मिसिंग लिंकवर दरड कोसळण्याच्या मुद्द्यावरून बोलताना मुख्यमंत्र्यांनी सरकारवर हल्लाबोल करणारे आणि सरकारला टीका करणाऱ्यांना भाडे के टट्टू म्हटलं होतं. त्यावरून महाराष्ट्र नवनिर्माण सेनेचे प्रमुख राज ठाकरेंनी फडणवीसांवर टीका केली होती. त्याला मु्ख्यमंत्र्यांनी अधिवेशनाच्या भाषणावेळी प्रत्युत्तर दिलं.राज ठाकरेंचे नाव न घेता त्यांना मिमिक्री अर्टिस्ट म्हटलं.

देवेंद्र फडणवीस यांनी आधी वापरलेल्या 'भाडे के टट्टू' या शब्दावरून टीका झाल्यावर, त्यांनी उपरोधिकपणे तो शब्द मागे घेत त्याला अधिक "सुसंस्कृत" भाषेत 'सुपारीबाज' असे म्हटले. राज ठाकरे यांनी फडणवीस यांच्या हिंदी भाषणातील वक्तव्यावर टीका केली होती. त्याला उत्तर देताना फडणवीस यांनी राज ठाकरे यांचा उल्लेख 'मिमिक्री आर्टिस्ट' (नक्कल करणारे कलाकार) असा केला.

फडणवीस पुढे म्हणाले की, ते (राज ठाकरे) आमचे मित्र आहेत आणि ते राजकारणात असल्यामुळे आम्हाला त्यांच्यापासून कोणताही धोका नाही. पण ते जर मिमिक्री किंवा स्टँड-अप कॉमेडीच्या क्षेत्रात गेले असते, तर इतर कोणत्याही स्टँड-अप कॉमेडियनला मार्केट उरले नसते. मिसिंग लिंक प्रकल्पातील पूल आणि बोगद्यांविषयी चुकीच्या बातम्या पसरवून '७,००० कोटी पाण्यात गेले' असे म्हणणे हा महाराष्ट्राचा अपमान आहे, असे सांगत त्यांनी अफवा पसरवणाऱ्यांवर टीका केली.

विधानसभेत आदल्या दिवशी रात्री ३:३८ वाजेपर्यंत या प्रस्तावावर चर्चा झाली. रोहित पवार, सुरेश धस, सुनील प्रभू, जितेंद्र आव्हाड, जयंतराव पाटील यांच्यासह एकूण ३२ सदस्यांनी या कायदा-सुव्यवस्था आणि शेतकऱ्यांच्या प्रश्नांवरील चर्चेत भाग घेतला. आधीच्या भाषणात वापरलेल्या 'भाडे के टट्टू' या शब्दावर विरोधकांनी आक्षेप घेत मुख्यमंत्र्यांनी सुसंस्कृत बोलायला हवे होते, अशी टीका केली होती. त्याला उत्तर देताना फडणवीस म्हणाले, मी अभ्यास करून तो शब्द मागे घेतो आणि त्याऐवजी अधिक सुसंस्कृत शब्द 'भाटक गदर्भ' किंवा सोप्या भाषेत 'सुपारीबाज' वापरतो,असं मु्ख्यमंत्री म्हणाले.