अतिवृष्टीमुळे झालेल्या नुकसानीची पाहणी मुख्यमंत्री देवेंद्र फडणवीस यांनी आज केली. लातूर येथील अतिवृष्टीमुळे नुकसान झालेल्या भागाची पाहणी करताना मुख्यमंत्र्यांनी पत्रकारांशी संवाद साधताना मोठी घोषणा केलीय. कोणी मोबाइलवर फोटो काढून दिला, तरी तो मान्य करू. ड्रोनचा पंचनामा आम्ही मान्य करून घेऊ.

सरकारी नोंद असली पाहिजे, एवढाच त्यामागचा उद्देश आहे. काही अडचण नाही. यंत्रणेनेही लवचिक राहावे. अशा परिस्थितीत खूप नियम सांगू नयेत. जास्तीत जास्त मदत करावी, असे देवेंद्र फडणवीस यांनी यावेळी स्पष्ट केलं.

दिवाळीपूर्वीच आम्ही मदत देणार असून एनडीआरएफचे नियम केंद्र सरकारने बदलले आहेत. दीर्घकालीन उपाययोजना करण्यावरही भर दिला जातोय. परंतु आत्ता तातडीची मदत देणे आवश्यक आहे. पंचनामे येतील, मग मदत देऊ. सहा महिने अनेक ठिकाणी मदत मिळत नाही. ही पद्धत आम्ही बदललेली आहे. एका तालुका, एका गावाचे आले, तरी लगेच मदत करत आहोत. २२०० कोटी रुपये आम्ही दिलेले आहेत. दिवाळीपूर्वी आम्ही सगळ्यांना मदत करू, असेही आश्वासन मुख्यमंत्र्यांनी दिलेत.

लातूर जिल्ह्यातील निलंगा तालुक्यातील औराद शहाजानी येथे झालेल्या अतिवृष्टीमुळे झालेल्या नुकसानीची पाहणी मुख्यमंत्र्यांनी केला. यावेळी पालकमंत्री शिवेंद्रसिंहराजे भोसले व माजी मंत्री आमदार संभाजी पाटील निलंगेकर उपस्थित होते. मुख्यमंत्र्यांनी नुकसानग्रस्त शेतकऱ्यांशीही संवाद साधत त्यांना धीर दिला.

'घाबरू नका, सरकार तुमच्या पाठीशी आहे,' असं मुख्यमंत्री फडणवीस म्हणाले. विरोधकांनी कधीही भरपाई दिली नाही. हे पहिले सरकार आहे, ज्यांनी पाहणीपूर्वीच 2200 कोटी रुपये शेतकऱ्यांच्या मदतीसाठी रिलीज केल्याचं मुख्यमंत्री म्हणाले.

कधीतरी विरोधकांनी आरशात पाहावे, त्यांच्या काळात आपत्ती आली तेव्हा त्यांनी काय केले होते?” असा टोलाही फडणवीसांनी लगावला. तर, शेतकऱ्यांसाठी जेवढं करता येईल ते आम्ही करत आहोत आणि पुढेही करू, असे आश्वासनही त्यांनी दिले.