माधव सावरगावे, छत्रपती संभाजीनगर

एखादी वस्तू आपण स्व बळावर घेताना ती खूप कष्टाने घेतो अगदी ती हजारोंची असो किंवा लाखोंची आपण तिला जीवापाड जपतो. मात्र हीच वस्तू नजरेआड झाली तर वाईटही तितकंच वाटतं. अशीच एक घटना संभाजीनगरमध्ये घडली आहे. एका तरुणाने कर्जावर घेतलेला ट्रक चोरीला गेल्याच्या नैराश्येतून जीवन संपवलं. संदेश दिनकर गवळी (वय २६) असे या मृत तरुणाचे नाव असून आत्महत्येपूर्वी त्याने सुसाईड नोट लिहिली आहे. यामध्ये संदेशने पोलिसांविरोधात संदेश लिहिला आहे. त्याच्या मृत्यूने गवळी कुटुंबियांवर दुःखाचा डोंगर कोसळला आहे.

मिळालेल्या माहितीनुसार, संभाजीनगर शहरातील जय भवानीनगरमध्ये ही घटना घडली. संदेश गवळी हा टँकरचा व्यवसाय करत होता. आई, वडील, दोन भाऊ, बहिणीसह तो जय भवानीनगरमध्ये राहत होता. त्याने बँकेतून कर्ज घेऊन ट्रॅक्टर विकत घेतला होता. हा ट्रॅक्टर काही दिवसांपूर्वी चोरीला गेला. याबाबत संदेशने पोलीस ठाण्यात फिर्याद देखील दिली होती. मात्र चोरीला गेलेला ट्रॅक्टर पोलिसांना सापडला नाही.

दुसरीकडे त्या ट्रॅक्टरच्या कर्जाचे हप्ते सुरूच राहिल्याने दीड वर्षापासून संदेश कर्जबाजारी होता. यामुळे तो सतत चिंतेत असायचा . गुरुवारी सायंकाळी कुटुंब एका कार्यक्रमासाठी गेले होते. त्यावेळी घरी त्यांनी विष घेतले. त्यानंतर संदेशला खासगी रुग्णालयात दाखल करण्यात आले. मध्यरात्री उपचारादरम्यान त्याचा मृत्यू झाला.

आत्महत्येपूर्वी संदेशने सुसाइड नोट लिहून हसरे सेल्फी काढले. हे फोटो मित्रांना व्हॉट्सअॅपवर पाठवून त्याने विष घेतले. सुसाईड नोटमध्ये त्याने म्हटले की, "ट्रकचे २१ लाखांचे कर्ज थकले आहे. त्याला कंटाळून मी माझी जीवनयात्रा संपवीत आहे. यासाठी दुसरे कोणीही जबाबदार नाही. शेवटच्या क्षणी लागणाऱ्या खर्चासाठी माफी असावी. माझ्या आईची काळजी घ्यावी. तू दिलेल्या जीवनाचे मी सार्थक करू शकलो नाही. आई, मला माफ कर" असे लिहून संदेशने आत्महत्या केली.