Chhatrapati Sambhajinagar:

छत्रपती संभाजीनगर जिल्ह्यातील सिल्लोड तालुक्यातील वांगी बुद्रुक येथील जिल्हा परिषद शाळेतून एक संतापजनक घटना समोर आली आहे. येथील पोषण आहाराच्या तांदळात चक्क अळ्या आणि उंदराच्या लेंड्या आढळून आल्यात. यामुळे पालकांनी चांगलाच राडा केलाय.

वांगी बुद्रुक येथे पहिली ते सातवीपर्यंत जिल्हा परिषदेची प्राथमिक शाळा असून त्यात १३३ विद्यार्थी शिक्षण घेतात. नेहमीप्रमाणे वांगी बुद्रुक शाळेत पोषण घेऊन ठेकेदारांची गाडी आली. त्यांनी पोषण आहाराचा दहा कट्टे तांदूळ शाळेच्या खोलीत टाकला. यावेळी तेथे असलेल्या सरपंच आणि गावातील काही नागरिकांनी तेथे जाऊन त्या तांदळांची तपासणी केली.

तांदळाचाी गोणी फाडल्यावर ते तांदूळ पाहताच उपस्थितांच्या पायाखालची जमीनच सरकली. त्यात चक्क अळ्या आणि उंदरांच्या लेंड्या दिसल्या. उपस्थितांनी याबाबत शिक्षण विस्तार अधिकारी राजू फुसे यांना दूरध्वनीवरून माहिती दिली.

दरम्यान या निकृष्ट आहारामुळे जर विद्यार्थ्यांना विषबाधा झाली तर? विद्यार्थ्यांच्या जिवावर बेतलं तर? या सर्वांना जबादार कोण असा प्रश्न नागरिकांकडून उपस्थित केला जातोय.

निकृष्ट पोषण आहार प्रकरणी मुख्याध्यापक निलंबित

गोंदियामध्येही शाळेमध्ये निकृष्ट दर्जाचे जेवण विद्यार्थ्यांना दिल्याने कारवाई करण्यात आली होती. पोषण आहार निष्कृष्ट दर्जाचा असल्याने आमगाव तालुक्यातील ग्राम अंजोरा येथील जिल्हा परिषद वरिष्ठ प्राथमिक शाळेतील (school) मुख्याध्यापक बी. सी. ठाकरे यांना निलंबीत करण्यात आलं होतं.