Chhatrapati Sambhajinagar News: संपूर्ण देशात सध्या टोमॅटोचे दर (Tomato Price) प्रचंड वाढले आहेत. टोमॅटोच्या गगनाला भिडलेल्या किमतीमुळे सर्वसामान्य जनतेच्या जेवणातून टोमॅटो गायब झाला आहे.

धक्कादायक म्हणजे टोमॅटोचे भाव वाढल्याने चोरट्यांनी आता टोमॅटो चोरीकडे आपला मोर्चा वळवला आहे. त्यामुळेच आपल्या शेतातील टोमॅटो चोरीला वैतागलेल्या छत्रपती संभाजीनगर जिल्ह्यातील एका शेतकऱ्याने चक्क टोमॅटोच्या पिकात सीसीटीव्ही कॅमेरे बसवून घेतले आहेत.

याबाबत अधिक माहिती अशी की, गंगापूर (Gangapur) तालुक्यातील लासुर परिसरात, आसेगाव, शहापूर बंजर, आंबेगाव, खोजेवाडी आदी गावातील शेतकऱ्यांनी जून महिन्यात मोठ्या प्रमाणात टोमॅटोची लागवड केली आहे. शहापूर बंजर येथील शेतकरी शरद लक्ष्मण रावते यांना अडीच एकर शेती असून अनेक वर्षांपासून ते त्यांच्या शेतात टोमॅटोचे पीक घेतात.

यावर्षी रावते यांनी जून महिन्यात दीड एकर शेतात टोमॅटोची लागवड केली आहे. रोप लागवड, औषध फवारणी, बांधणी, मजुरी असा आतापर्यंत एकूण ७० ते ८० हजार रुपयांचा खर्च त्यांनी टोमॅटो लागवडीवर केला आहे. आठ- दहा दिवसात त्यांच्या शेतातील टोमॅटो तोडणीला येणार आहेत.

मात्र, या टोमॅटोवर चोरट्यांची नजर पडली. रात्रीच्या वेळी कोणीतरी त्यांच्या शेतातून कच्चे टोमॅटो चोरून घेऊन जात असल्याचं आढळून आले. त्यामुळे वैतागलेल्या रावते यांनी नुकतेच टोमॅटो चोरी रोखण्यासाठी पिकाच्या मधोमध २० ते २२ हजार रुपये खर्च करून उच्च प्रतीचे सीसीटीव्ही कॅमेरे बसवले आहेत. या सीसीटीव्ही कॅमेऱ्यामध्ये सायरन तसेच ऑडियो व्हाईसची सुविधा असून हा सीसीटीव्ही कॅमेरा मोबाईलवरून ऑपरेट करता येतो. (Latest Marathi News)