Chhatrapati Sambhajinagar Accident : छत्रपती संभाजीनगरमध्ये दोन दुचाकींचा समोरासमोर भीषण अपघात झालाय. यामध्ये तीन जणांचा मृत्यू झाला आहे. तर एक जण जखमी आहे. जखणींवर जवळच्या रूग्णालयात उपचार सुरू आहे. जखमी तरूणाची प्रकृती चिंताजनक असल्याचे समजतेय. खराडी ते मलकापूर रोडवर दोन दुचाकीची धडक झाल्याची माहिती मिळत आहे.

छत्रपती संभाजीनगरातील वाळूज महानगरातील तुर्काबाद खराडी ते मलकापूर रोडवर दोन मोटरसायकली समोरासमोर धडकल्या. या अपघातात तीन जण ठार झाले. तर एक व्यक्ती गंभीर जखमी झाला आहे. आकाश मच्छिंद्र साठे, सुमित आप्पासाहेब आव्हाड आणि मुस्ताक मुनीर शाह अशी अपघातात मृत्यू झालेल्या तिघांची नावे आहेत.

मिळालेल्या माहितीनुसार, आकाश आणि सुमित हे दुचाकीवर लग्नासाठी जात होते तर मुस्ताक आणि मुबारक हे दोघेही दुचाकीवर तुर्काबादच्या दिशेने जात होते. यावेळी शिरोडी शिवारात दोन्ही दुचाकी समोरासमोर धडकल्या अन् चौघेही रस्त्यावर फेकले गेले. यातील तिघांचा जागेवरच मृत्यू झाला तर एक गंभीर जखमी झाला आहे. त्याच्यावर जवळच्या रूग्णालयात उपचार सुरू आहेत.