माधव सावरगावे, संभाजीनगर

देशामध्ये दहशत पसरवणाऱ्या बिश्नोई गँगचे छत्रपती संभाजीनगर (Chhatrapati Sambhaji Nagar) कनेक्शन समोर आले आहे. बिश्नोई गँगसाठी रेकी करणे, शस्त्रांची डिलिंग करणे याप्रकरणी संभाजीनगरमधून एकाला अटक करण्यात आली आहे. बिश्नोई गँगसाठी (Bishnoi Gang) वसीम चिकना हे काम करत असल्याची माहिती मिळताच पनवेल पोलिसांनी त्याला अटक केली आहे. छत्रपती संभाजीनगर येथून त्याला अटक करण्यात आली आहे. वसीम जालना जिल्ह्यातील असून यामुळे छत्रपती संभाजीनगर शहराचे बिष्णोई गँग कनेक्शन उघड झाले आहे.

प्रसिद्ध गायक सिद्धू मूसेवाला हत्या प्रकरण, खंडणी, हत्या यासह बॉलिवूड अभिनेता सलमान खानला (Bollywood Actor Salman Khan) जीव मारण्याची धमकी देणाऱ्या गँगस्टर लॉरेन्स बिश्नोई गँग देशभरात वेगवेगळ्या कारणांनी चर्चेत येत असते. या बिश्नोई गँगची देशभरामध्ये मोठी दहशत आहे. याच बिश्नोई गँगचे छत्रपती संभाजीनगर कनेक्शन आता समोर आले आहे.

लॉरेन्स बिश्नोई गँगसाठी रेकी करणे , शस्त्रांच्या बिलिंगचे काम छत्रपती संभाजीनगर येथील वसीम मोहम्मद उर्फ वसीम चिकना हा करत होता. पनवेल पोलिसांना यासंदर्भात माहिती मिळताच त्यांनी त्याला अटक केली आहे. सलमान खानच्या घरावर रेकी करण्यासाठी त्या परिसरामध्ये रूम शोधण्यासाठी वसीम चिकना सांगत होता अशी माहिती सूत्रांच्या आधारे पोलिसांना मिळाली आहे.

छत्रपती संभाजीनगर शहरातील जालानगर परिसरातील अलंकार अपार्टमेंटमध्ये राहणाऱ्या मोहम्मद उर्फ वसीम चिकनाला पनवेल पोलिसांनी नुकताच अटक केली. सलमान खान धमकी प्रकरणी आतापर्यंत ५ आरोपींना अटक करण्यात आली असून त्यांची चौकशी केली असता वसीम चिकनाचे नाव समोर आले होते.

या प्रकरणी पनवेल पोलिसांनी तातडीने छत्रपती संभाजीनगर पोलिसांशी संपर्क साधून क्रांती चौक पोलिसांच्या मदतीने जालानगर परिसरामध्ये राहणाऱ्या वसीम चिकनाला अटक केली. सध्या पोलिसांकडून वसीम चिकनाची कसून चौकशी सुरू आहे. त्याच्या चौकशीतून बिश्नोई गँगसंदर्भात बरीच माहिती समोर येऊ शकते.