भरत मोहळकर, साम टीव्ही

महायुतीचं सरकार स्थापन झालं...मंत्र्यांनी शपथ घेतली...मात्र यात अजितदादांनी छगन भुजबळांना डावललं आणि भुजबळांचे सूरच बदलले....एकेकाळचे कट्टर राजकीय विरोधक असलेल्या देवेंद्र फडणवीसांवर टीकेची एकही संधी न सोडणाऱ्या भुजबळांचे सूर चांगलेच बदलले आहेत.

मंत्रिमंडळातून डावलल्यामुळे नाराज भुजबळांनी जाहीर मेळाव्यातून अजितदादांवर टीका केली तर त्याचवेळी फडणवीसांवर कौतुकाचा वर्षाव केला. एवढंच नव्हे तर सावित्रीबाई फुलेंच्या जयंतीच्या कार्यक्रमाला भुजबळांनी थेट फडणवीसांच्या गाडीतून प्रवास केला...त्यामुळे त्यांच्या जवळिकीच्या चर्चेला आणखीनच बळ मिळालं.... हे कमी होतं की काय याच कार्यक्रमाच्या मंचावर भुजबळ आणि फडणवीसांनी एकमेकांचं तोंडभरून कौतुक केलं.

कशी वाढली फडणवीस-भुजबळांची जवळीक?

मराठा आरक्षणाच्या आंदोलनादरम्यान मनोज जरांगेंनी फडणवीस आणि भुजबळांना टार्गेट केलं होतं. फडणवीसांनी जरांगेंविरोधात कामयच मौन बाळगलेलं असताना भुजबळांनी मात्र जरांगेंवर तोडीस तोड उत्तर दिलं. एवढंच नव्हे तर ओबीसी आंदोलनाला बळ देण्यासाठी भुजबळ मैदानात उतरले होते. त्यांनी ओबीसीच्या मुददयावर सागर बंगल्यावर जाऊन फडणवीसांची भेटही घेतली होती. त्यामुळे ओबीसी आरक्षणाच्या मुद्यावरून भुजबळ आणि भाजपात छुपी युतीच असल्याची चर्चा त्यावेळी रंगली होती. त्यामुळेच की काय महायुतीची सत्ता आल्यानंतर फडणवीस भुजबळांच्या मंत्रिपदासाठी आग्रही होते अशीही चर्चा राजकीय वर्तुळात आहे.

फुलेंचा विचार आणि कार्य पुढे नेण्याचं श्रेय भुजबळ हे नेहमीच शरद पवारांना देत आले. मात्र नायगावच्या कार्यक्रमात पहिल्यांदाच भुजबळांनी जाहीरपणे सावित्रीबाई फुलेंच्या विचारांचा वारसा फडणवीस चालवत असल्याचं सांगत कौतुक केलं. तर क्रांतीज्योती सावित्रीबाईंच्या स्मारकाच्या कामाला गती भुजबळांमुळे मिळाल्याचं सांगत फडणवीसांनी भुजबळांना बळ देण्याचा प्रयत्न केला. त्यामुळे जाहीर कार्यक्रमात रंगलेला फडणवीस-भुजबळांकडून एकमेकांचा हा केवळ कौतुक सोहळा होता की ही भुजबळांच्या पक्षांतराची नांदी याबाबत आता राजकीय विश्वात जोरदार चर्चा सुरू आहे.