मंगेश मोहिते

नागपूर : एका तरुण-तरुणीची फेसबुक (Facebook) वरून ओळख झाली, त्यानंतर चॅटिंग करून प्रेम संबंध निर्माण झाले. लग्नाचे आमिष दाखवत तरुणीशी शारीरिक संबंध ठेवून पीडितेला धोका दिल्याची घटना नागपुरात (Nagpur) समोर आली आहे. तरुणीने दाखल केलेल्या पोलीस तक्रारीनुसार ही घटना नागपूरच्या गणेशपेठ पोलीस स्टेशन च्या हद्दीत घडली आहे.

हे देखील पहा :

सविस्तर माहिती अशी, भंडाऱ्यातील (Bhandara) एका २१ वर्षीय युवतीची फेसबुकच्या माध्यमातून समाधान रामचंद्र पवार (कामोठे, नवी मुंबई) नामक युवकाशी ओळख झाली. या ओळखीतून बऱ्याच दिवस त्यांनी एकमेकांशी चॅटिंग केली. चॅटिंग नंतर आरोपी समाधान पवार याने तरुणीला भेटण्यासाठी नागपूरला बोलावले.

23 सप्टेंबर 2020 रोजी सदर युवती मुंबईहून (Mumbai) आलेल्या समाधान पवार याला भेटण्यासाठी नागपूरला आली. ती तीन दिवस नागपुरातील सेंट्रल एव्हेन्यूच्या हॉटेल ओरिएंट मध्ये आरोपी सोबत मुक्कामी राहिली. दरम्यान, या तीन दिवसाच्या कालावधीत आरोपीने तरुणीला लग्नाचे आमिष दाखवून तिच्याशी शारीरिक संबंध प्रस्थापित केले. त्यानंतर तो मुंबई ला निघून गेला.

शारीरिक संबंधानंतर विद्यार्थीनीने समाधान यास लग्नाची गळ घातली असता तो पीडितेला टाळत होता. आरोपीने लग्नास नकार दिला त्यामुळे विद्यार्थिनीने भंडारा आणि नागपूरच्या गणेशपेठ पोलीस स्टेशनमध्ये तक्रार दाखल केली. सदर प्रकरणी पोलिसांनी गुन्हा दाखल केला असून पुढील कारवाई सुरू आहे. मात्र, सोशल मिडियाच्या माध्यमातून अनोळखी व्यक्तीशी ओळख किती धोकादायक ठरू शकते याचे सदर प्रकरण उत्तम उदाहरण मानावे लागेल.

Edited By : Krushnarav Sathe