चेतन व्यास, साम टीव्ही, प्रतिनिधी

राज्यात विधानसभा निवडणुका कधीही जाहीर होऊ शकतात. यातच महाविकास आघाडी आणि महायुतीतील पक्षांचे अद्याप जागावाटप निश्चित झालेलं नाही. याचदरम्यान, ठाकरे गटाचे (उद्धव बाळासाहेब ठाकरे) पक्षप्रमुख उद्धव ठाकरे यांनी मविआने मुख्यमंत्रीपदाचा चेहरा जाहीर करावा आणि निवडणुकीला सामोरे, जावं असं म्हटलं होतं. तर अलीकडेच संजय राऊत यांनी उद्धव ठाकरे हेच महाराष्टातील जनतेच्या मनातील मुख्यमंत्री असल्याचं वक्तव्य केलं होतं. यावरूनच आता भाजप प्रदेशाध्यक्ष चंद्रशेखर बावनकुळे यांनी घणाघाती टीका केली आहे.

काय म्हणाले चंद्रशेखर बावनकुळे?

चंद्रशेखर बावनकुळे म्हणाले आहेत की, ''उद्धव ठाकरे कटोरा घेऊन फिरत आहेत, मला मुख्यमंत्री करा, मला मुख्यमंत्री करा, काँग्रेसकडे जातं आहे, शरद पवार कडे जातं आहे.'' ते म्हणाले, ''काँग्रेसकडे नाना पटोले यांच्या सारखे दहा नेते तयार झाले आहेत. महाविकास आघाडीमध्ये मुख्यमंत्रीपदासाठी चढाओढ सुरु आहे.''

'डबल इंजिन सरकार आलं पाहिजे'

बावनकुळे म्हणाले की, ''आपल्याकडे डबल इंजिन सरकार आलं पाहिजे. 2029 पर्यंत केंद्रात मोदींचे सरकार आहे आणि राज्यातलं सरकार एका विचारचं आलं आणि दोन्ही सरकार एका विचाराचे आले, तर महाराष्ट्राच्या 14 कोटी जनतेला फायदा होऊ शकतो. म्हणून महाराष्ट्रात डबल इंजिनच महायुतीचं सरकार पाहिजे.''

ते म्हणाले, ''दिल्लीत मोदीजी यांचे सरकार आहे आणि त्याचा पूर्ण फायदा महाराष्ट्राला झाला पाहिजे. म्हणून राज्यात सरकार महायुतीचे सरकार येणं गरजेचं आहे. जर महाविकास आघाडीला चुकून मत दिलं आणि सरकार महाविकास आघाडीच आलं, तर जसं उद्धव ठाकरे यांनी पंधरा योजना बंद केल्या होत्या त्यांच्याकाळात, त्यांनी तर पंतप्रधान आवास योजना सुद्धा बंद केली होती.

चंद्रशेखर बावनकुळे पुढे म्हणाले, ''पुन्हा महाविकास आघाडीच सरकार आलं तर ते केंद्र सरकारचे कोणतेही सपोर्ट घेणार नाही. मोदींनी राज्याला कितीही म्हटलं की, हे घ्या ते घ्या, पण ते घेणार नाही. कारण मोदींचं होईल. महाविकास आघाडीचे लोक योजना नाकारतील. यामुळे डबल इंजिन सरकार हे आमची प्राथमिकता असून मुख्यमंत्रीपद हे महाविकास आघाडीची प्राथमिकता आहे.'