चंद्रपूर : चंद्रपुरात एक अत्यंत दु:खद घटना उघडकीस आली आहे. चंद्रपूर जिल्ह्यातील नागभीड येथील घोडाझरी तलावात ५ जणांचा बुडून मृत्यू झाल्याची घटना घडली आहे. घटनेची माहिती मिळताच पोलिसांनी घटनास्थळी धाव घेतली आहे. या घटनेत फक्त एकाचा जीव वाचला आहे. पाच जणांच्या मृत्यूने गावात खळबळ उडाली आहे. तर आता पाचही युवकांचे मृतदेह शोधून बाहेर काढण्यात यश मिळालं आहे.

घोडाझरी तलावात बुडून पाच युवकांचा मृत्यू झाल्याची घटना घडल्यानंतर पोलिसांनी वेळीच घटनास्थळ गाठत बचावकार्य सुरू केलं. यात पाचही युवक पर्यटनासाठी आले होते. तुडुंब भरलेल्या तलावात सहा युवक उतरले. यात जनक गावंडे , यश गावंडे, अनिकेत गावंडे, तेजस गावंडे, तेजस ठाकरे या पाच जणांचा बुडून मृत्यू झाला, तर एक जण सुखरूप बचावला. हे सर्व मित्र चिमूर तालुक्यातील साठगाव कोलारीचे रहिवासी आहेत. यात दोन सख्खे भाऊ आणि दोन चुलत भाऊ आणि एका मित्राचा समावेश आहे. घटनेची माहिती मिळताच पोलीस घटनास्थळी पोहोचले आणि दिवस बुडण्याच्या आत पाचही जणांचे मृतदेह काढण्यात प्रशासनाला यश आलं आहे.