>> जयेश गावंडे

अकोला : शिंदे गटाच्या खासदार भावना गवळी यांच्या विरोधात घोषणाबाजी केल्याप्रकरणी शिवसेना (Shivsena) ठाकरे गटाचे खासदार विनायक राऊत, आमदार नितीन देशमुख यांच्यासह काही शिवसैनिकांवर गुन्हे दाखल करण्यात आले आहेत. शिंदे गटाच्या खासदार भावना गवळी यांच्या तक्रारीनंतर हा गुन्हा दाखल करण्यात आला आहे.

शिवसेना ठाकरे गटाचे खासदार विनायक राऊत हे काल अकोल्यात आले होते. दरम्यान विनायक राऊत यांना रेल्वे स्थानकावर निरोप देण्यासाठी आलेल्या आमदार नितीन देशमुख यांच्यासह शिवसैनिक उपस्थित होते. याच दरम्यान शिंदे गटाच्या खासदार भावना गवळी या अकोला रेल्वे स्थानकावर दिसताच त्यांच्या विरोधात कार्यकर्त्यांनी घोषणाबाजी सुरू केली. (Latest Marathi News)

शिंदे गटाच्या खासदार भावना गवळी यांनी याची तक्रार अकोला रेल्वे पोलीस स्टेशनला दिली होती. दरम्यान आज याप्रकरणी गुन्हे दाखल करण्यात आले आहेत. खासदार विनायक राऊत, आमदार नितीन देशमुख यांच्यासह इतरांवर कलम 294, 143 आणि 34 अंतर्गत गुन्हे दाखल करण्यात आले आहेत.

नेमकं काय घडलं?

काल अकोला रेल्वे स्थानकावर शिवसेनेच्या शिंदे गटाच्या खासदार भावना गवळी आणि ठाकरे गटाचे खासदार विनायक राऊत आमने-सामने आले आहेत. ठाकरे गटाच्या कार्यकर्त्यांची भावना गवळींसमोर 'गद्दार-गद्दार' अशी घोषणाबाजी केली आहे. भावना गवळी डब्याच्या बाहेर आल्यानंतरही ठाकरे गटाच्या कार्यकर्त्यांची प्रचंड घोषणाबाजी केली. घोषणाबाजीच्या वेळी आमदार नितीन देशमुखही उपस्थित होते. खासदार गवळी बसलेल्या डब्याच्या खिडकीच्या काचावर ठाकरे गटाच्या कार्यकर्त्यांनी बुक्क्या देखील मारल्या.