लातूर : लातूर (Latur) जिल्ह्यातील रेणापूर येथील एका क्लबवर चाकूर- रेणापूरचे उपविभागीय पोलीस अधिकारी यांच्या पथकाने धाड टाकून तिर्रट जुगार खेळणाऱ्या ३९ जणांना रंगेहाथ पकडले. या पथकानं घटनास्थळावरुन १ लाख ७२ हजारांचा मुद्देमाल जप्त केला आहे. (Latur Crime News)

उपविभागीय पोलीस अधिकारी निकेतन कदम यांच्या पथकाला रेणापूरजवळील एका बारजवळ क्लबमध्ये जुगार सुरू असल्याची माहिती मिळाली. या माहितीच्या आधारे सोमवारी संध्याकाळी सहाच्या सुमारास छापा मारला असता ३९ जण तिर्रट नावाचा जुगार खेळताना निदर्शनास आले.

त्यांच्याकडून जुगार साहित्यासह १ लाख ७२ हजार १३० रुपयांचा मुद्देमाल जप्त करण्यात आला. पोलीस निरिक्षक दीपक शिंदे, सहाय्यक पोलीस निरिक्षक बालाजी भंडे या पथकाने ही कारवाई केली. या कारवाईमुळे जुगार खेळणा-यांचे धाबे दणादणले आहेत.

Edited By : Siddharth Latkar