बुलढाण्यातून धक्कदायक बातमी समोर आली आहे. जिल्ह्यात एक ते दीड वर्षाच्या चिमुकल्या मुलीच्या शरीराचे अवशेष सापडल्याने खळबळ उडाली आहे. सदर घटना बुलढाणा जिल्ह्यातील मेहकर शहरात घडली आहे. या प्रकरणात पोलिसांनी धक्कदायक खुलासा केला आहे. या घटनेने परिसरात भीतीचे वातावरण निर्माण झाले आहे.

मिळलेल्या माहितीनुसार, मेहकर तालुक्यातील पीर मोहम्मद पहाडिया परिसरात एका ते दीड वर्षाच्या मुलीचा कंबरेखालचा भाग आणि एक पाय आढळून आला होता. या घटनेची माहिती मिळताच पोलिसांनी वरिष्ठ अधिकारी, फॉरेन्सिक टीम आणि डॉग स्क्वॉडला घटनास्थळी पाचारण केलं. सुरुवातीला ही घटना घातपाताची असल्याचा संशय व्यक्त करण्यात आला होता.

पोलीस निरीक्षक व्यंकटेश्वर अलीवार यांनी दिलेल्या माहितीनुसार मेहकर जानेफळ रस्त्यावरील पालवात राहणाऱ्या एका भटक्या कुटुंबातील दीड वर्षाच्या बालिकेची प्रकृती अचानक बिघडली होती. तिला ग्रामीण रुग्णालयात नेण्यात आले, डॉक्टरांनी प्रकृती गंभीर असल्याने पुढील उपचारासाठी तिला तातडीने हलविण्याचा सल्ला दिला. मात्र उपचारापूर्वीच या चिमुकलीने रस्त्यातच अखेरचा श्वास घेतला.

भटक्या समाजातील हे कुटुंब असल्याने त्यांनी आपला शोक दाबत रात्री जानेफळ रस्त्यालगत असलेल्या महानुभाव पंथाच्या स्मशानभूमी जवळ चिमुकलीवर अंत्यसंस्कार केले. खड्डा पुरेसा खोल न झाल्याने प्रेत नीट पुरले गेले नसल्याचे समोर आले आहे. याच कारणामुळे रात्री उशिरा मोकाट कुत्र्यांनी तो खड्डा उकरून मृतदेह बाहेर काढला आणि शरीराचे काही भाग फाडून नेले.

या घटनेबाबत पोलिसांचा तपास सुरू आहे. आतापर्यंत कोणताही संशयास्पद प्रकार आढळलेला नाही, अशी माहिती पोलिसांनी दिली आहे. सुरुवातीला घातपाताचा संशय होता. पण तपासानंतर स्पष्ट झालं की मुलीचा नैसर्गिक मृत्यू झाला होता. जनावराने प्रेत बाहेर काढल्याने अवशेष सापडले.