बुलढाणा : संपूर्ण राज्यात पावसाचे थैमान पाहायला मिळत आहे. मात्र पश्चिम विदर्भात पावसाने दडी मारल्याने जिल्हा वासियांना दमदार पावसाची प्रतीक्षा कायम आहे. चांगला पाऊस न झाल्याने बुलढाणा जिल्ह्यातील धरणांनी तळ गाठले आहेत. परिणामी आजही जिल्ह्यात पाणी संकट कायम असून ७० टँकरद्वारे पाणी पुरवठा केला जात आहे. 

पावसाळ्याचे (Rain) दोन महिने उलटून गेले आहेत. मात्र पावसाने बुलढाणा (Buldhana) जिल्ह्याकडे पाठ फिरवली असून जिल्हा वासियांना पाणी टंचाईला सामोरे जावे लागण्याची शक्यता वर्तविली जात आहे. पाऊस नसल्याने पाण्याची पातळी खालावली असून नागरिकांना पिण्यासाठी पाणी वेळेवर उपलब्ध होऊ शकत नाही. यामुळे आजही जिल्ह्यात ७० ठिकाणी टँकरने पाणी पुरवठा केल्या जात असल्याचे चित्र आहे. जिल्हा प्रशासनाने पाणी टंचाईवर मात करण्यासाठी कुठल्या उपाययोजना केल्या आहेत. याबाबत माहिती दिली जात नसल्याने जिल्हावासीय चिंतेत आहे.

धरणातील साठा झाला कमी 

उन्हाळ्यातील भीषण टंचाईनंतर (Water crisis) पावसाळ्यात पाण्याचा प्रश्न सुटेल अशी आशा जिल्हा वासियांना होती. मात्र पावसाळ्याच्या दोन महिन्यानंतर देखील जिल्हावासीयांना पाणी टंचाईला सामोरे जावे लागत आहे. दरम्यान जिल्ह्यात तीन मोठे प्रकल्प, ७ मध्यम प्रकल्प आणि ९८ लघु प्रकल्प असून या सर्व प्रकल्पात पाणी साठा ० टक्के शिल्लक राहिला आहे. यामुळे जिल्ह्यातील नागरिकांनी चिंता आता अधिक वाढली आहे.