बुलढाणा : बुलढाणा जिल्ह्यातून जाणाऱ्या धुळे- नागपूर या राष्ट्रीय महामार्गावर मलकापूर ते खामगाव दरम्यान मोठ्या प्रमाणात बायोडिझेलचे पंप उभारून बायोडिझेलची अवैध विक्री केली जात आहे. याठिकाणी मुंबईच्या दक्षता पथकाने छापा टाकत कारवाई केली आहे. याठिकाणी अवैधरित्या विक्री होणाऱ्या पेट्रोल सदृश पदार्थ जप्त करण्यात आला असून चार जणांना ताब्यात घेण्यात आले आहे. 

धुळे- नागपूर या राष्ट्रीय महामार्गावर मलकापूरपासून मोठ्या प्रमाणात बायोडिझेल पंप उभारण्यात आले आहेत. याठिकाणी अवैधपणे पेट्रोल व डिझेल सदृश ज्वलनशील पदार्थांची विक्री केली जात असल्याचे समोर आले आहे. याबाबत तक्रारी करण्यात आल्या आहेत. मात्र स्थानिक प्रशासनाचा याकडे जाणून बुजून दुर्लक्ष असल्याचा आरोप नेहमी होत असतो. याच दरम्यान मुंबईहून आलेल्या पथकाकडून कारवाई करण्यात आली आहे. 

धाड टाकत दोन पंप केले सील  

मुंबई येथील राज्यस्तरीय दक्षता पथक व बुलढाणा पुरवठा विभागाने मलकापूर तालुक्यातील तालसवाडा तसेच रणथम येथे दोन अवैध बायोडिझेल पंपावर धाड टाकत कारवाई केली आहे. या कारवाईत दोन्ही पंप सील करण्यात आले आहेत. तसेच १४ जणाविरुद्ध दसरखेड एमआयडीसी पोलीस ठाण्यात गुन्हा दाखल करून बायोडिझेल सदृश्यने भरलेले दोन टँकर देखील जप्त करण्यात आले आहेत.

चार जणांना घेतले ताब्यात 

दरम्यान या कारवाईत चार आरोपींना पथकाने अटक देखील करण्यात आली आहे. तसेच ७१ लाखांचा मुद्देमाल जप्त करण्यात आला आहे. या कारवाईमुळे बायोडिझेल माफियांचे धाबे दणाणले असून डीझेल व पेट्रोल सदृश्य ज्वलनशील पदार्थ अवैधरित्या विक्री करणाऱ्यावर यापुढे देखील धडक कारवाई करण्यात येईल, अशी माहिती बुलढाणा जिल्हा पुरवठा अधिकारी गजानन टेकाळे यांनी दिली आहे.