बुलढाणा : बुलढाणा जिल्ह्याच्या चिखली पोलीस स्टेशन हद्दीतून एक १२ वर्षीय मुलगी बेपत्ता झाली होती. चिखली पोलिसात याबाबत तक्रार दाखल झाल्यानंतर पोलिसांकडून तपास सुरु करण्यात आला होता. दरम्यान मिळालेल्या माहितीवरून पोलिसांनी मुलीला पळवून नेत पश्चिम बंगालमध्ये असल्याचे समोर आले. यानंतर पोलिसांनी मुलीची सुटका करत संशयिताला ताब्यात घेतले आहे.  

बुलढाणा (Buldhana News) जिल्ह्याच्या चिखली पोलीस स्टेशन हद्दीत वास्तव्यास असलेली एक मुलगी आपल्या नातेवाइकांसोबत भंडाऱ्याच्या कार्यक्रमात गेली होती. मात्र याठिकाणाहून ती बेपत्ता झाली होती. नातेवाईकांनी शोध घेऊनही ती सापडली नसल्याने नातेवाइकांनी चिखली पोलिसांत तक्रार दिली. त्यात एका व्यक्तीवर संशयही व्यक्त केला होता. यामुळे शहरात तणावाची शक्यता निर्माण झाल्याने (Police) पोलिसांनी प्रकरणाचे गांभीर्य लक्षात घेता मुलीच्या शोधासाठी तीन पथके रवाना केली.  

पोलिसांना गोपनीय व तांत्रिक तपासातून मिळालेल्या माहितीनुसार आरोपी व पीडिता ही पश्चिम बंगालमध्ये असल्याचे समोर आले.  दरम्यान पोलीस पथकाने पश्चिम बंगालमध्ये तीन दिवस शोध मोहीम राबवून आरोपी मुन्ना शहा मुबारक शहा याच्या ताब्यातून पीडितेची सुटका केली. आरोपीला अटक करून न्यायालयात हजर केले असता आरोपीला न्यायालयाने ३० सप्टेंबरपर्यंत पोलीस कोठडी सुनावली आहे.