संजय जाधव, प्रतिनिधी...

Buldhana News: बुलढाणामधून एक धक्कादायक बातमी समोर आली आहे. बुलढाण्याच्या शेगाव तालुक्यातील जिल्हा परिषदेच्या शाळेत खिचडी शिजवताना सिलेंडरला आग लागल्याची दुर्घटना घडली. यामध्ये खिचडी शिजवणारी महिला जखमी झाली असून सुदैवाने सिलेंडरचा स्फोट न झाल्याने मोठी दुर्घटना टळली.

याबाबत अधिक माहिती अशी की, शेगाव तालुक्यातील जळंब या गावातील जिल्हा परिषद प्राथमिक कन्या शाळेत विद्यार्थ्यांना खिचडी शिजवताना सिलेंडरने पेट घेतल्याची दुर्घटना घडली. गॅस सिलेंडरची नळी निसटल्याने सिलेंडरने पेट घेतला. या आगीत् खिचडी शिजवणारी महिला जखमी झाली असून तिला प्राथमिक आरोग्य केंद्रात उपचारार्थ भरती करण्यात आले आहे.

यावेळी शाळेमध्ये इयत्ता पहिली ते चौथीमधील १०० विद्यार्थीनी उपस्थित होत्या. या घटनेत सिलेंडरने पेट घेतल्याने खिचडी शिजवण्याच्या खोलीला आग लागली. या आगीत खोलीतील सर्व साहित्य जळून खाक झाले आहे. सुदैवाने सिलेंडरचा ब्लास्ट झाला नाही, त्यामुळे जीवितहानी झाली नसून मोठा अनर्थ टळला आहे.. (Buldhana News)

दरम्यान, याबाबतीत जिल्हा परिषद शिक्षणाधिकाऱ्यांना विचारणा केली असता शिक्षणाधिकारी सुटीवर असून त्यांचा फोन बंद आहे. तर सहाय्यकांना विचारणा केला असता त्यांनी फक्त माहिती मिळाली असल्याचे सांगितले. एकूणच शिक्षण विभाग या घटनेवर फारसे गंभीर नसल्याचे दिसून येत आहे. (Latest Marathi News)