बुलढाणा : खामगाव तालुक्यातील पिंपळगाव राजा येथून जवळच असलेल्या वडजी भेंडी गावच्या शेत शिवारात (IPL) आयपीएल २०२३ च्या क्रिकेट मॅचवर ऑनलाईन सट्टा (Online Betting) सुरू होता. या ऑनलाईन सट्ट्यावर बुलढाणा येथील एलसीबी पथकाने छापा टाकून पोलिसांनी तीन जणांना ताब्यात घेतले आहे. (Latest Marathi News)

बुलढाणा एलसीबी पथकाला मिळालेल्या माहितीच्या आधारे शेत शिवारात सुरू असलेल्या सट्ट्यावर छापा टाकून रामसिंग विलास पवार (रा. वडजी भेंडी), अजय किसनदास बैरागी (रा. घाटपुरी नाका खामगाव) व अक्षय गणेश जुनारे (रा. गोपालनगर खामगाव) हे तिघे मोबाईल व लॅपटॉपच्या सहाय्याने आयपीएल क्रिकेट मॅचवर ऑनलाईन सट्टा खेळताना आढळून आले. पोलिसांनी त्यांना ताब्यात घेतले आहेत.

सव्‍वा लाखाचा मुद्देमाल जप्‍त

सट्टा लावत असलेल्‍या जागेवरून सहा मोबाईल किंमत २५ हजार, एचपी कंपनीचा लॅपटॉप किंमत ३५ हजार रूपये, पेन ड्राईव्ह, पेन व नगदी १ हजार ५५० रुपये असा एकूण १ लाख २२ हजार ३६० रुपयांचा मुद्देमाल जप्त केला. त्यांच्याविरुद्ध कलम १२ अ मजकुरांन्वये गुन्हा नोंदविण्यात आला आहे.