बुलढाणा : बुलढाणा जिल्ह्यातील मलकापूर शहरात दुर्दैवी घटना घडली आहे. रिक्षामध्ये ऑक्सिजन सिलेंडर ठेवताना हि घटना घडली असून यात सिलेंडरचा स्फोट होऊन एका जणांचा मृत्यू झाला आहे. तर दोन जण जखमी झाल्याची घटना घडली आहे. जखमींना लागलीच उपचारासाठी रुग्णालयात दाखल करण्यात आले आहे. 

बुलढाणा जिल्ह्यातील मलकापूर येथील लक्ष्मीनगर परिसरात सदरची घटना आज दुपारच्या सुमारास घडली आहे. रुग्णालयात लागणारे ऑक्सिजन सिलेंडर भरण्याचे काम सुरु होते. तीन ते चार कामगार हे काम करत होते. रिक्षामध्ये हे ऑक्सीजन सिलेंडर ठेवण्याचे काम सुरु असताना यातून गॅस गळती होण्यास सुरवात झाली. काही क्षणातच या सिलेंडरचा स्फोट झाला. यामुळे मोठा आवाज होऊन परिसर हादरला होता. 

एका जणांचा मृत्यू 

ऑक्सिजन सिलेंडरमधून गळती होऊन सिलेंडरचा अचानक स्फोट झाला. स्फोटामुळे सिलेंडरचे तुकडे झाले होते. या स्फोटात एक जण ठार झाला असून दोन जण गंभीर जखमी झाले आहेत. दोन्ही जखमी कामगारांना लागलीच रुग्णालयात उपचारासाठी दाखल करण्यात आले आहे. तसेच रिक्षाचे देखील यात मोठ्या प्रमाणात नुकसान झाले आहे.

नागरिकांची धावपळ 

रिक्षामध्ये सिलेंडर ठेवत असताना गॅस गळतीमुळे किंवा अन्य तांत्रिक कारणामुळे हा स्फोट झाला असावा अशी शक्यता व्यक्त केली जात आहे. दरम्यान परिसरात देखील यामुळे मोठा हादरा बसला होता. यामुळे नागरिकांमध्ये घाबरत पसरली होती. घटनेची माहिती मिळताच स्थानिक नागरिकांनी तत्काळ धाव घेत जखमींना मदत केली. त्यानंतर जखमींना पुढील उपचारासाठी रुग्णालयात हलविण्यात आले आहे. या स्फोटामुळे परिसरात भीतीचे वातावरण निर्माण झाले आहे.