.फोटोतील विनोद गंगणे हे नाव काही महिन्यांपूर्वी तुळजापूरच्या ड्रग्ज प्रकरणात गाजत होतं. महाराष्ट्राची कुलदेवता असलेल्या भवानी देवीच्या तुळजापुर नगरीला नशेचा विळखा बसला आहे. राज्यभरात गाजलेल्या या गुन्ह्यातील आरोपी विनोद गंगणेला अटक झाली होती. तो काही दिवस जेलमध्ये होता. सध्या जामिनावर बाहेर आला आहे. याच ड्रग्ज तस्कर विनोद गंगणेला भाजपने थेट नगराध्यक्षपदाची उमेदवारी दिलीय. गंगणेच्या उमेदवारीवरुन विरोधकांनी भाजपवर जोरदार निशाणा साधलाय. जनतेनं गुन्हेगाराला धडा शिकवावा अशी मागणी ठाकरेसेनेचे खासदार ओमराजे निंबाळकरांनी म्हटलंय.

ड्रग्स तस्करीतील आरोपींच्या जवळकीवरुन भाजप आमदार राणाजगजितसिंह पाटील वादात सापडलेत. ड्रग्ज तस्करीला राजाश्रय मिळतोय हे पाहून चिंता वाटली असं म्हणत खासदार सुप्रिया सुळेंनी आरोपींच्या भाजप प्रवेशावरुन थेट मुख्यमंत्र्यांना पत्र लिहलं होतं. या पत्राला राणा जगजितसिंह पाटील यांनी पत्रातूनच उत्तर दिलंय. तसंच राजकीय अपरिहार्यतेपोटी सुप्रिया सुळेंनी आरोप केले असतील असा टोलाही त्यांनी सुप्रिया सुळेंना लगावला.

याआधी गँगस्टर दाऊद इब्राहिमचा सहकारी सलीम कुत्ता प्रकरणात भाजपनं नाशिकमधील ठाकरे सेनेचे नेते सुधाकर बडगुजरांविरोधात रानं उठवलं होतं. मात्र त्यानंतर त्यांचा भाजपमध्ये प्रवेश झाला. तुळजापूर ड्रग्ज प्रकरणातील आरोपी संतोष परमेश्वर याने भाजपात पक्षप्रवेश केला. हे कमी होतं की काय पालघर साधू हत्याकांडातला आरोपी काशिनाथ चौधरींनाही भाजपनं प्रवेश दिला होता. मात्र चौफेर टीका झाल्यामुळे अखेर चौधरींच्या प्रवेशाला स्थगिती देण्याची नामुष्की भाजपावर आली.

नगराध्यक्षासारख्या जबाबदारीच्या पदासाठी इलेक्टोरल मेरीटच्या नावाखाली गंभीर गुन्ह्यातल्या आरोपीला निवडणुकीत उतरवले जात आहे. गंगणे दोषी नसले तरी ते ड्रग्ज तस्करीतले मुख्य आरोपींपैकी एक आहेत. त्यांना जोपर्यंत कोर्टाकडून दोषमुक्त केलं जात नाही तोपर्यंत निवडणुकीपासून दूर ठेवता आलं असतं. मात्र अशा प्रकारांमुळेच राजकारणाची प्रतिमा सुधारण्याऐवजी आणखी बिघडणार एवढं मात्र नक्की..