Pankaja Munde News: भाजपचे दिवंगत नेते गोपीनाथ मुंडे यांच्या नवव्या स्मृतिदिनानिमित्त बीडच्या परळी येथील गोपीनाथ गडावरील कार्यक्रमात पंकजा मुंडे यांनी उपस्थितांना संबोधित केले. यावेळी पंकजा मुंडे यांनी गोपीनाथ मुंडे यांच्या आठवणींना उजाळा दिला. 'माझा एवढा मोठा बाप राहिला नाही. आता त्यांच्यापेक्षा लहान माणसांकडून काय अपेक्षा करू, असं म्हणत पंकजा मुंडे भावुक झाल्या. (Latest Marathi News)

'माझं राजकारण केवळ समाजाचं भलं करण्यासाठी आहे. मला परळीतून पराभव पत्करावा लागला. मला जर भूमिका घ्यायची असेल, तर मी पत्रकार मित्रांना बोलावून भूमिका घेईन. कुणाच्या खांद्यावर बंदूक ठेवून भूमिका मांडणार नाही. पंकजा मुंडे राजकारणात भूमिका घेईल, ती छातीठोकपणे घेईल. अनेक लोक निवडणुका हरले, मात्र त्यांना संधी दिली', असे पंकजा मुंडे पुढे म्हणाल्या.

'माझा नेता अमित शहा आहे. मी त्यांची भेट घेणार आहे. त्यांना मी मनमोकळं बोलणार आहे. मी रडगाणं गाणारी नाही. तुमचं प्रेम, तुमची दशा आणि तुमचं प्रेम यावरचं माझं राजकारण असणार आहे. माझ्या जीवनात संयमाशिवाय काहीच नाही. माझा एवढा मोठा बाप राहिला नाही. आता त्यांच्यापेक्षा लहान माणसांकडून काय अपक्षे करू. तुम्ही धीर धरा, असं म्हणत पंकजा मुंडे भावुक झाल्या.

'आयुष्यात निवडणुकीचे अपयश कधीच माझ्या जिव्हारी लागलं नाही. मात्र, पुन्हा या वैद्यनाथ कारखान्याला पूर्वीसारखं वैभव प्राप्त करून देण्यासाठी काम करायचं आहे. माझ्या भूमिका कुणाच्याही आडून असणार नाही. सत्य हे सूर्यासारखं आहे. मी माझ्या नेत्यांशी चर्चा करणार आहे. त्यानंतर माझ्या मनात काय आहे हे तुमच्यासमोर बोलणार आहे. कुणाला काही वाटो, कुणी काही अर्थ काढो, मात्र मी कुणासमोर कधी झुकणार नाही, असा इशारा पंकजा मुंडे यांनी दिला.