पराग ढोबळे, नागपूर प्रतिनिधी

नागपूर पदवीधर मतदारसंघाच्या निवडणुकीत भाजपची अधिकृत उमेदवारी जाहीर होताच पक्षात मोठ्या बंडखोरीची शक्यता निर्माण झाली आहे. भाजपने सुधाकर कोहळे यांना आज अधिकृत उमेदवारी जाहीर केली. यामुळे नाराज झालेले भाजपचे ज्येष्ठ नेते आणि माजी आमदार अनिल सोले बंडाच्या तयारीत आहे. सूत्रांनी दिलेल्या माहितीनुसार उद्या ते अपक्ष म्हणून उमेदवारी अर्ज दाखल करणार असल्याची माहिती मिळत आहे. या शक्यतेमुळे नागपूर भाजपमध्ये मोठी खळबळ उडाली आहे.

उमेदवारी नाकारल्याने सोले नाराज?

नागपूर पदवीधर मतदारसंघासाठी भाजपमधून सुधाकर कोहळे आणि अनिल सोले हे दोघेही प्रबळ दावेदार होते. अनिल सोले यांनी तर सोशल मीडियावर प्रचाराला सुरुवातही केली होती. मात्र, भाजपने आज अखेर सुधाकर कोहळे यांच्या नावावर शिक्कामोर्तब केले. गेल्या निवडणुकीतही भाजपने अनिल सोले यांना ऐनवेळी डावलून संदीप जोशी यांना उमेदवारी दिली होती. आता सलग दुसऱ्यांदा डावलले गेल्यामुळे अनिल सोले यांनी अपक्ष लढण्याचा निर्णय घेतल्याचे समजते. अनिल सोले हे केंद्रीय मंत्री नितीन गडकरी यांचे अत्यंत निकटवर्तीय आणि सहकारी मानले जातात. त्यांनी नागपूरचे महापौरपदही भूषवले आहे.

मुख्यमंत्र्यांकडून कोहळेंचे अभिनंदन

दरम्यान, महाराष्ट्राचे मुख्यमंत्री सध्या नागपूर दौऱ्यावर असून, उमेदवारी जाहीर होताच सुधाकर कोहळे यांनी त्यांचे शासकीय निवासस्थान 'रामगिरी' येथे जाऊन भेट घेतली. यावेळी मुख्यमंत्र्यांनी कोहळे यांचे पुष्पगुच्छ देऊन अभिनंदन केले.

"सोले माझे गुरू, नाराजी नाही" – सुधाकर कोहळे

उमेदवारी मिळल्यानंतर बोलताना सुधाकर कोहळे म्हणाले, "मी गेल्या ३५ वर्षांपासून भाजपचा कार्यकर्ता आहे. पक्षाने वर्षभरापूर्वीच मला नोंदणी प्रमुख म्हणून जबाबदारी दिली होती आणि अलर्ट केले होते. वर्षभरात आम्ही जोरदार नोंदणी केली आहे. माजी आमदार अनिल सोले हे माझे गुरू आहेत आणि मी त्यांच्याच मार्गदर्शनाखाली काम करत आहे. त्यांची कोणतीही नाराजी नाही आणि गेल्या वेळच्या चुका सुधारून ही जागा आम्ही निश्चित जिंकू."

काँग्रेस विरुद्ध भाजप थेट सामना

दुसरीकडे, काँग्रेसने या मतदारसंघातून अभिजित वंजारी यांना दुसऱ्यांदा मैदानात उतरवले आहे. त्यामुळे नागपूर पदवीधर मतदारसंघात काँग्रेसचे अभिजित वंजारी विरुद्ध भाजपचे सुधाकर कोहळे अशी थेट लढत पाहायला मिळणार आहे. मात्र, अनिल सोले यांनी खरोखरच अपक्ष अर्ज भरल्यास भाजपची ही बंडखोरी पक्षाला महागात पडू शकते आणि निवडणुकीचे चित्र पूर्णपणे बदलू शकते.