महाराष्ट्रातील बदलत्या राजकीय समीकरणांच्या पार्श्वभूमीवर भाजपने युवा मोर्चाची ही नवी फळी मैदानात उतरवलीय. 29 पदाधिकाऱ्यांच्या खांद्यावर आता संपूर्ण महाराष्ट्रातील तरुण वर्गाला पक्षाशी जोडण्याची जबाबदारी देण्यात आलीय. पक्षातील संघटनात्मक बदल करण्यात आल्यानंतर आता भाजपकडून युवा मोर्चात मोठा बदल करण्यात आलाय. भाजप प्रदेशाध्यक्ष रविंद्र चव्हाण यांच्या सूचनेनुसार भाजप युवा मोर्चाच्या नव्या प्रदेश कार्यकारिणीमध्ये 35 वर्षांपेक्षा कमी वयाच्या तरुणांना संधी देण्यात आलीय.

प्रदेश सरचिटणीस युवा मोर्चा प्रभारी सुनील राणे आणि युवा मोर्चाचे प्रदेशाध्यक्ष कृष्णराज महाडिक यांनी भाजप युवा मोर्चाच्या नव्या प्रदेश टीमची अधिकृत घोषणा करण्यात आलीय. या नव्या कार्यकारिणीत एकूण 29 पदाधिकाऱ्यांच्या नावांचा समावेश आहे. या निर्णयामुळे भाजपच्या युवा आघाडीत नवा उत्साह पाहायला मिळतोय. दरम्यान या नव्या टीमच्या घोषणेनंतर आता लवकरच जिल्हा आणि तालुका स्तरावरील युवा मोर्चाच्या नव्या कार्यकारिणी जाहीर केल्या जाणार असल्याचे संकेत मिळत आहेत.

या नव्या कार्यकारिणीत तरुणाईला प्राधान्य देण्यात आले आहे. संधी देण्यात आलेल्या उमेदवारांचे वय हे 35 वर्षांपेक्षा कमी आहे. पक्ष संघटनेत आक्रमक आणि नव्या दमाच्या तरुणांना संधी देऊन आगामी निवडणुकांच्या रिंगणात पक्षाची ताकद वाढवण्याचा भाजपचा हा मोठा मास्टरस्ट्रोक मानला जातोय.

जाहीर करण्यात आलेल्या या यादीत राज्यातील विविध विभागांतील तरुण चेहऱ्यांना स्थान मिळालंय. पक्षाची ध्येयधोरणे आणि कामे तळागयाळातील तरुणांपर्यंत पोहोचवण्यासाठी ही नवी टीम सज्ज झालीय. 35 वर्षांपेक्षा कमी वयोगटातील चेहऱ्यांना संधी देऊन भाजप युवा मोर्चाच्या माध्यमातून राज्यातील तरुण मतदारांना आकर्षित करण्याचा प्रयत्न भाजपकडून केला जातोय.

शंभवी साळेकडे युवती प्रमुखाची धुरा

भाजपच्या या नव्या कार्यकारिणीत अत्यंत महत्त्वाची मानली जाणारी 'युवती प्रमुख' (Yuvati Pramukh) पदाची जबाबदारी 28 वर्षीय शंभवी साळे (Shambhavi Sale) हिच्याकडे सोपवण्यात आली. शंभवी साळे या नांदेडच्या आहेत. राज्यातील युवतींचे संघटन मजबूत करणे आणि तरुणींच्या प्रश्नांवर भाजप युवा मोर्चाच्या माध्यमातून आवाज उठवणे, ही मुख्य जबाबदारी आता शंभवी साळे पार पाडणार आहेत. शंभवी साळे यांच्या निवडीमुळे राज्यातील युवती संघटकांमध्ये आनंदाचे वातावरण असून त्यांच्यावर अभिनंदनाचा वर्षाव होतोय.