कल्याण डोंबिवलीच्या राजकीय वर्तुळातून मोठी बातमी समोर येत आहे. कल्याण डोंबिवलीत शिवसेना शिंदे गटाची ताकद वाढली असून, राष्ट्रवादी काँग्रेस शरदचंद्र पवार गटाला धक्का बसला आहे. शरदचंद्र पवार गटातील पदाधिकारी यांनी शिवसेना शिंदे गटात प्रवेश केला आहे. शिवसेनेचे माजी नगरसेवक महेश गायकवाड यांच्या पुढाकाराने हा पक्षप्रवेश पार पडला आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर कल्याण डोंबिवलीत राष्ट्रवादी काँग्रेस शरदचंद्र पवार गटाला धक्का मानला जात आहे.

सर्वोच्च न्यायालयानं दिलेल्या निकालानंतर स्थानिक स्वराज्य संस्थांच्या निवडणुका लवकरच पार पडतील. याच पार्श्वभूमीवर अनेक तालुक्यांमध्ये राजकीय उलथापालथ पाहायला मिळत आहे. अशातच कल्याण डोंबिवलीतही मोठी राजकीय घडामोड घडली आहे. राष्ट्रवादी काँग्रेस शरदचंद्र पवार गटातील पदाधिकारी प्रकाश तरे यांनी पक्षाला जय महाराष्ट्र करण्याचा निर्णय घेतला आहे.

प्रकाश तरे यांनी आज उपमुख्यमंत्री एकनाथ शिंदे यांच्या उपस्थितीत धनुष्यबाण हाती घेतलं आहे. शिवसेनेचे माजी नगरसेवक महेश गायकवाड यांच्या पुढाकाराने हा पक्षप्रवेश पार पडला असल्याची माहिती आहे. या पक्षप्रवेशाबाबत तरे म्हणाले, 'उपमुख्यमंत्री एकनाथ शिंदे यांच्या नेतृत्वाखाली शिवसेना कायम सामान्य जनतेसाठी काम करीत आली आहे. विकासाच्या वाटचालीत सहभागी होण्यासाठी मी शिवसेनेत प्रवेश केलाय', असं तरे म्हणाले.

यावेळी उपमुख्यमंत्री एकनाथ शिंदे यांनी नव्या सहकाऱ्याचे स्वागत केले आहे. प्रकाश तरे यांच्या पक्षप्रवेशामुळे कल्याण डोंबिवलीत शिवसेनेची ताकद वाढली असल्याची चर्चा आहे. या पक्षप्रवेशामुळे राष्ट्रवादी काँग्रेस शरदचंद्र पवार गटाच्या स्थानिक संघटनेला मोठा धक्का बसला आहे.