शुभम देशमुख 
भंडारा : तुमसर तालुक्यातील देव्हाडी तुमसर रोड रेल्वे स्थानकासमोर काही अंतरावर असलेल्या रेल्वे रुळावर अहमदाबाद- पुरी एक्सप्रेस रेल्वे गाडीच्या समोर येऊन युवकाने आत्महत्या केल्याची घटना घडली. दरम्यान हि घटना सकाळी घडली असून युवकाने आत्महत्या कोणत्या कारणाने केली याचे कारण अद्याप समजलेले नाही. पोलीस घटनेचा तपास करत आहेत. 

गोंदिया जिल्ह्यातील तिरोडा तालुक्यामधील बहेवाडा येथील संदिप बळीराम रोडगे (वय ३९) असे आत्महत्या करणाऱ्या युतकाचे नाव आहे. तुमसर रोड रेल्वे स्थानका समोर येथील रेल्वे कर्मचारी कर्तव्यावर असताना सदर युवक रेल्वेच्या गाडीच्या समोर येऊन आत्महत्या केल्याची घटनेची माहिती रेल्वे पोलीसांना देण्यात आली. दरम्यान रेल्वे पोलीस घटनास्थळी दाखल होऊन घटनास्थळाचा पंचानामा करुन मृतदेह शवविच्छेदनासाठी तुमसर उपजिल्हा रुग्णालयात दाखल करण्यात आले. 

पोलिसांकडून पंचनामा करत तपास सुरु 

पोलिसांनी मृतदेह ताब्यात घेतला असून मृत संदीप रोडगे या युवकाच्या हातावर एस नाव लिहले आहे. तर अंगात काळ्या रंगाचा टि शर्ट व निळ्या रंगाचा जिन्स पॅन्ट घातलेली आहे. सदर घटनेची नोंद देव्हाडी पोलिसात करण्यात आली असून सदर घटनेचा पुढील तपास तुमसर पोलीस करीत आहेत.

आत्महत्येचे कारण अस्पष्ट 

देव्हाडी- तुमसर रोड रेल्वे स्थानकावर सकाळच्या सुमारास घडलेल्या घटनेने खळबळ उडाली आहे. मात्र सदर युवकाने टोकाचे पाऊल कोणत्या कारणातून उचलले, याचे कारण अद्याप समोर आलेले नाही. पोलिसांनी घटनेची माहिती मृत युवकाच्या कुटुंबियांना कळविली असून पुढील तपास पोलिसांकडून सुरु असून यातून आत्महत्येचे कारण समोर येऊ शकेल.