शुभम देशमुख 
भंडारा : मागील दोन- तीन दिवसांपासून राज्यातील अनेक भागात अवकाळी पाऊस होत आहे. दरम्यान आज सकाळी भंडारा जिल्ह्यात विजांच्या कडकडाटासह पावसाला सुरवात झाली. यातच वीज कोसळून शेतात काम करणाऱ्या दोन शेत मजुरांचा मृत्यू झाल्याची घटना  भंडाऱ्याच्या तुमसर तालुक्यातील पाथरी शेत शिवारातील सकाळच्या सुमारास घडली आहे. मृतकात एका महिलेचा समावेश आहे. 

हवामान विभागाकडून राज्यात अवकाळी पावसाचा अंदाज वर्तविण्यात आला आहे. त्यानुसार मागील दोन- तीन दिवसांपासून राज्यातील विविध भागात विजांच्या कडकडाटासह अवकाळी पाऊस होत आहे. तर काही ठिकाणी जोरदार वारा देखील आहे. यात काही ठिकाणी वीज पडल्याच्या घटना घडल्या आहेत. त्यानुसार भंडारा जिल्ह्यात आज सकाळी विजेच्या कडकडाटासह पावसानं जोरदार हजेरी लावली. 

सध्या रब्बी पिकांचा हंगाम सुरू असून शेतातील कामे करण्यासाठी सकाळीच शेतात जात असतात. पावसाची शक्यता असल्याने कामे आवरण्याचा प्रयत्न शेतकऱ्यांचा आहे. दरम्यान आज सकाळी नेहमीप्रमाणे शेतावर काम करण्यासाठी शेतकरी व शेतमजूर कामासाठी गेले होते. शेतात कामाला सुरवात केली असतानाच अचानक विजांच्या कडकडाटासह पावसाला सुरवात झाली. यात वीज कोसळून दोन शेतमजुराचा मृत्यू झाला. मृतकात एका महिलेसह पुरुषाचा समावेश आहे. 

एकजण थोडक्यात बचावला 

मनीषा भारत पुष्पतोडे (वय २५) आणि प्रमोद मणिराम नागपुरे (वय ४५) असं विज पडून मृत झालेल्या दोघांची नावे आहेत. हे दोघेही तुमसर तालुक्यातील पाथरी येथील रहिवासी आहे. यावेळी मृतक मनीषा पुष्पतोडे यांचा सासराही या शेतावर काम करीत होते. मात्र ते त्यांच्यापासून दूर असल्याने या घटनेतून थोडक्यात बचावले आहेत.