शुभम देशमुख

भंडारा : महाराष्ट्रातील नागपूर रेल्वे विभाग परिसरात अहमदाबाद ते हावडा रेल्वे स्थानकादरम्यान धावणाऱ्या हावडा एक्सप्रेस ट्रेनवर अज्ञात व्यक्तींनी दगडफेक केली आहे. तुमसर तिरोडा दरम्यान झालेल्या या दगडफेकीत (Railway) रेल्वेच्या B3 एसी कोचच्या काचा फुटल्या. या घटनेने डब्यात (Bhandara) बसलेले प्रवासी भयभीत झाले. मात्र, एकाही प्रवाशाला दुखापत झाली नाही, ही दिलासादायक बाब आहे. (Tajya Batmya)

हावडा एक्सप्रेस सोमवारी २८ ऑगस्टला रात्री साडेनऊ वाजेच्या सुमारास नागपूर विभागातील तुमसर ते तिरोडा स्थानकांदरम्यान आली असतांना रेल्वेवर दगडफेक झाल्याची घटना घडल्याचे रेल्वे प्रवाशांनी सांगितले. यामध्ये बी-3 कोचच्या ४१-४८ क्रमांकाच्या सीटच्या खिडकीच्या काचा फुटल्या. अचानक घडलेल्या या प्रकारामुळे प्रवाशी भयभीत झाले होते. 

रेल्वे पथकाकडून पंचनामा 

घटनेची माहिती मिळताच रेल्वेचे पथक घटनास्थळी पोहोचले. तिरोडा रेल्वे स्थानकावर गाडी आल्यानंतर घटनेचा पंचनामा करण्यात आला. या प्रकरणाचा तपास सुरू असल्याचे सांगण्यात आले. या घटनेत कोणत्याही प्रवाशाला दुखापत झाली नाही.