शुभम देशमुख 
भंडारा : हवामान विभागाने वर्तविलेल्या अंदाजानुसार भंडारा जिल्ह्यात पावसाने दमदार हजेरी लावली होती. यामुळे अनेक भागात पूरजन्य परिस्थिती निर्माण झाली आहे. यात महाराष्ट्र आणि मध्यप्रदेश या दोन राज्यांना जोडणारा बपेरा पूलावर ३ ते ४ फूट पाणी असल्यामुळे महाराष्ट्र आणि मध्यप्रदेश या दोन राज्यांचा संपर्क तुटला आहे.

भंडारा (Bhandara) जिल्ह्यात झालेल्या मुसळधार पावसामुळे जिल्ह्यातील तुमसर तालुक्यात वैनगंगा नदी काठच्या बाम्हणी गावात पुराचे पाणी गावात शिरल्याने पूर परिस्थिती निर्माण झाली आहे. तर शेकडो एकर शेती पाण्याखाली आल्याने शेतकरी पुन्हा संकटात सापडला आहे. अशीच परिस्थिती सर्वच तालुक्यात पाहायला मिळत आहे. विशेष बाब म्हणजे मागच्या पंधरा दिवसापासून पावसाने पाठ फिरविली होती. मात्र दोन दिवस सुरु असलेल्या पावसाने जनजीवन विस्कळीत झाले आहे.  

अनेक गावांचा संपर्क तुटला
भंडारा जिल्ह्यात दोन दिवसापासून (Heavy Rain) मुसळधार पावसाने हजेरी लावल्यामुळे नदी- नाले ओसंडून वाहत आहेत. भंडारा जिल्ह्यातील जीवनदायी समजली जाणारी वैनगंगा नदी ही धोक्याच्या पातळीच्या वर वाहत आहे. भंडारा तालुक्यातील खमारी गावाजवळील छोटा पूल हा पाण्याखाली गेला असून जवळपास २५ गावांच्या संपर्क तुटला आहे. पलीकडे गावकऱ्यांना ये जा करायची असल्यास लांब फेऱ्यांनी जावे लागत आहे. पूर परिस्थितीमध्ये प्रशासनाच्या वतीने खबरदारी म्हणून या ठिकाणी पोलीस कर्मचाऱ्यांची नियुक्ती करण्यात आलेली नसल्याचा चित्र आपल्याला दिसत आहे.