शुभम देशमुख 
भंडारा : गोडाऊनमध्ये लावण्यात येत असलेले धानाचे पोते एकावर एक अशा पद्धतीने रचले जात होते. मात्र पोत्यांचा ढीग जास्त उंच झाल्याने पोते कोसळले. भरलेले पोते तेथे उभ्या असलेल्या लोकांच्या अंगावर पडले. यात वाहन चालकाचा दाबून मृत्यू झाला तर अन्य दोन मजूर जखमी झाले आहेत. सदरची घटना भंडारा जिल्ह्यातील मिटेवानी येथे घडली आहे.  

भंडारा जिल्ह्यातील तुमसरच्या बडा बाजार येथील राजेश बिसने (वय ४५) असे घटनेत मृत झालेल्या चालकाचे नाव आहे. मिटेवानी येथील भाऊजी सुशिक्षित बेरोजगार सहकारी संस्था संचालित धान खरेदी केंद्राचे धान गोडाऊन आहे. या गोडाऊनमध्ये धानाने भरलेल्या पोत्याचे ढिगारे लावण्याचे काम करण्यात येत होते. काही मजूर पोते वाहून आणत होते, तर काहीजण ढिगारे रचण्याचे काम करत होते. 

ढिगाऱ्यावरील पोते अचानक कोसळले 

दरम्यान पोत्यांचे ढिगारे वाजवीपेक्षा जास्त उंचीचे व असुरक्षितरीत्या लावण्यात येत होते. ढिगारे लावण्याकरिता तिथे मजूर काम करीत असताना अचानक ढिगाऱ्यावर ठेवण्यात आलेले काही पोते खाली कोसळले. यावेळी तिथे काम करीत असलेल्यापैकी दोन मजुरावर व तिथे उभा असलेल्या वाहन चालक राजेश बिसने यांच्यावर कोसळला. तिघेही धानाच्या पोत्याखाली दबले गेले. 

मजुरांनी धाव घेतली पण.. 

पोते कोसळल्याचे पाहून सोबत काम करीत असलेल्या मजुरांनी धाव घेत पोत्यांच्या ढिगाऱ्याखालून तिघांना बाहेर काढले. यानंतर त्यांना तुमसरच्या उपजिल्हा रुग्णालय येथे उपचाराकरिता दाखल केले. यात राजेश बिसने यांचा मृत्यू झाला. तर दोघे मजूर गंभीर जखमी झाले आहेत. यातील ज्ञानेश्वर लसुंते यांना पुढील उपचारासाठी भंडारा येथे हलविण्यात आले आहे.