शुभम देशमुख 
भंडारा : वडिलांनी रागावल्यामुळे सुमारे दोन महिन्यांपूर्वी घर सोडून निघून गेलेल्या कोच्छी येथील २४ वर्षीय युवकाचा मृतदेह गावालगतच्या जंगलात गळफास घेतलेल्या अवस्थेत आढळून आला आहे. संपूर्णपणे सडलेल्या स्थितीतील आढळून आलेल्या मृतदेहाचा पंचनामा करत पोलिसांनी गावकरी आणि त्याच्या पालकांकडून शहानिशा करून ओळख पटविली. 

विनोद ताराचंद मेश्राम असे या मृत युवकाचे नाव आहे. विनोद हा मागील दोन महिन्यांपूर्वी वडिलांनी हटकले असता नाराज झालेल्या विनोदने घरातून निघून जात स्वतःला गळफास घेऊन आत्महत्या केल्याची घटना उघडकीस आली. ही घटना भंडारा जिल्ह्यातील कोच्छी येथील जंगल परिसरात उघडकीस आली. या घटनेत स्थानिक कोच्छी येथील विनोदचाच असल्याचे वडील व गावकऱ्यांनी ओळखल्याने स्पष्ट झाले आहे. 

फोन न उचलल्याने वडील रागावले 

विनोद मेश्राम हा युवक मागील वर्षी ११ नोव्हेंबर रोजी सायंकाळी ५ वाजताच्या सुमारास गावाजवळील चुलबंद नदीवर मासे पकडण्यासाठी गेला होता. वडिलांनी त्याला फोन केला. मात्र त्याने कॉल रिसिव्ह केला नाही. त्यामुळे तो घरी परतल्यावर वडिलांनी त्याला मोबाइलवरील कॉल न स्वीकारल्याबद्दल रागावले होते. तेव्हापासून विनोद हा बेपत्ता झाला होता. त्याचा पालक व नातेवाईकांकडून शोध सुरु असताना सापडला नव्हता. 

सरपण गोळा करण्यासाठी गेलेल्या महिलांना दिसला मृतदेह 

दरम्यान, सकाळच्या सुमारास काही महिला जंगलात सरपण गोळा करण्यासाठी गेल्या असता जंगलातील एका झाडाला लटकलेल्या अवस्थेत एक मृतदेह आढळून आला. या घटनेची माहिती महिलांनी गावकऱ्यांना दिली. विनोद दोन महिन्यांपासून बेपत्ता असल्याने त्याच्या पालकांनी आणि पोलिसांनी घटनास्थळाला जात पाहणी केली. त्याच्या पालकांनी मृतदेहाची ओळख पटवून तो विनोदच असल्याचे सांगितले. पोलिसांनी या घटनेची नोंद घेतली असून पंचनामा केला व आकस्मिक मृत्यूची नोंद घेतली आहे.