शुभम देशमुख 

भंडारा : जंगल परिसरात या दिवसात तेंदू पत्ता संकलनाचे काम केले जाते. अशाच प्रकारे तेंदू पत्ता संकलन करण्यासाठी (Bhandara) गेलेल्या इसमावर अस्वलाने अचानक हल्ला चढविला. यात सदर इसम गंभीर जखमी झाल्याची घटना भंडारा जिल्ह्याच्या लाखांदूर तालुक्यातील मुर्जा पारडी येथे घळली आहे. 

रमेश हागरू आंबेडारे (वय ६०) असे अस्वलाच्या हल्ल्यात जखमी झालेल्या इसमाचे नाव आहे. प्राप्त माहितीनुसार तेंदु पत्ता संकलन करण्याचे काम मोठ्या प्रमाणात सुरू आहे. याच दरम्यान रमेश आंबेडारे हे तेंदु पत्ता संकलन करत असताना अचानक (Bear) अस्वलीने त्यांच्यावर हल्ला चढवीला. यात त्यांच्या उजव्या पायाला गंभीर दुखापत केली आहे. सदर घटना सोबत काम करणाऱ्या मजुरांच्या लक्षात येताच त्यांनी अस्वलाला हाकलून लावले. 

यानंतर गंभीर जखमी झालेल्या रमेश यांना लाखांदूर येथील ग्रामीण रुग्णालयात प्रथम उपचारासाठी आणण्यात आले. यावेळी ग्रामीण रुग्णालयाचे वैद्यकीय अधीक्षक डॉ. दत्तात्रय ठाकरे यांनी जखमीवर उपचार केले. सदर घटनेची माहिती लाखांदूर (Forest Department) वन विभागाला होताच वनपरिक्षेत्र अधिकारी हे जखमीच्या भेटीसाठी ग्रामीण रुग्णालयात दाखल झाले. जखमीला शासकीय मदत मिळवून देण्याचे आश्वासन दिले.