शुभम देशमुख 
भंडारा : अकरावी विज्ञान शाखेला प्रवेशित ३६ विद्यार्थ्यांना वर्षाच्या अंतिम परीक्षेपासून वंचित ठेवण्यात आल्याचा प्रकार भंडारा येथील जिल्हा परिषद जकातदार माध्यमिक व उच्च माध्यमिक शाळेत समोर आला आहे. वर्षभरासाठी असलेली विद्यालयाची फि बाकी असल्याने या विद्यार्थ्यांना परीक्षेला बसू देण्यात आले नसल्याचे कारण देण्यात आले आहे. या निर्णयामुळे विद्यार्थ्यांचे शैक्षणिक वर्ष वाया जाण्याची शक्यता आहे. 

भंडारा जिल्हा परिषदेची जकातदार माध्यमिक आणि उच्च माध्यमिक विद्यालयात अकरावी सायन्सला शिक्षण विभागाची अद्याप ग्रँड मिळलेली नाही. त्यामुळं येथे शिक्षण घेणाऱ्या ६० विद्यार्थ्यांकडून अकरावी आणि बारावी अशा दोन वर्गाचे एकूण १० हजार रुपये शाळा शुल्क घेतले जाते. दरम्यान काही विद्यार्थ्यांनी शुल्क भरलं नाही. तर काही विद्यार्थ्यांनी पाच हजार रुपये शाळा शुल्क भरलेले आहे. 

शिक्षकांचे वेतन थकल्याचे कारण 

असे असतानाही शाळेतील ३६ विद्यार्थ्यांनी शाळा शुल्क न भरल्याच्या कारणावरून आज विज्ञान शाखेच्या मराठी विषयाच्या पहिल्या पेपराला सदर विद्यार्थ्यांना बसू नं देता शाळेतून आल्यापावली परत पाठविण्यात आले. या ३६ विद्यार्थ्यांमध्ये मुलींची संख्या अधिक आहे. मुलांच्या शाळा शुल्कमधून त्यांना शिकविणाऱ्या शिक्षकांचे वेतन केले जाते आणि विद्यार्थ्यांकडून शुल्क न आल्याने शिक्षकांचे वेतन थांबल्याची बाब पुढे करून मुख्याध्यापक हटवार यांनी विद्यार्थ्यांना परीक्षेपासून वंचित ठेवले आहे. 

मुख्याध्यापकास कारणे दाखवा नोटीस 

मुळात मुलींना मोफत शिक्षण देण्यात येत असते. असे असताना देखील फी बाकी असल्याच्या कारणावरून परीक्षेला बसू दिले नाही. याची दखल घेत जिल्हा परिषद प्राथमिक विभागाचे शिक्षणाधिकारी रवींद्र सोनटक्के यांनी तातडीने शाळेला भेट देत मुख्याध्यापक हटवार यांना कारणे दाखवा नोटीस बजावली आहे.