भंडारा : पैशाच्या हव्यासापोटी आजकाल कोण काय करेल याची खात्री नाही. भंडाऱ्यातील कारधा पोलीस स्टेशन हद्दीतून एका चोरट्याने चक्क रोडरोलरच लांबविला होता. या चोरट्याला पोलिसांनी अटक करत बेड्या ठोकल्या आहेत. गिरीराज उर्फ पप्पू दाजीबा तवाडे (वय ३०) रा. सानगडी ता. साकोली असे अटक करण्यात आलेल्या आरोपीचे नाव आहे. (Bhandara Crime News)

मिळालेल्या माहितीनुसार, कारधा पोलीस स्टेशन हद्दीतील जानेवारी महिन्यात करचखेडा येथे रस्त्याचे काम सुरू होते. या कामावर भंडारा शहरातील पटेलपुरा वार्डातील मनीष चुटे यांचा रोड रोलर होता. काम बंद झाल्यानंतर सदर रोलर रस्त्यालगत उभा असल्याचे बघून आरोपी गिरीराज याने संधी साधली.

काही दिवस त्यावर पाळत ठेवून गिरीराज याने रोलर चोरण्याचा बेत आखला. गिरीराज याने तुमसर येथील क्रेन बोलावत, लाखनी येथून एकाचा ट्रक बोलाविला. क्रेनच्या मदतीने दीड लाख रुपये किमतीचा रोड रोलर उचलून ट्रकमध्ये ठेवून तो नागपूरला नेऊन तिथे विकला. याप्रकरणी तक्रार नोंद झाल्याने कारधा पोलिसांनी तपास करत आरोपीला अटक केली आहे.