बेळगावच्या शिवापूर गावातील सिद्धेश्वर मठातून एक धक्कादायक घटना उघडकीस आली आहे. रात्रीच्यावेळेस मठात अडवी सिद्धराम स्वामी यांना महिलेसोबत रंगेहाथ पकडलं. गावकऱ्यांना याची माहिती मिळताच त्यांनी तातडीने घटनास्थळी धाव घेतली. १० ते १५ जणांनी मिळून स्वाजींना याचा जाब विचारला. तसेच मठाबाहेर एकच गोंधळ घातला. या घटनेनंतर पोलिसांनी तातडीने धाव घेत परिस्थिती नियंत्रणात आणण्याचा प्रयत्न केला. या घटनेनंतर स्वामीजींना तातडीने मठातून हकालपट्टी केली.

घटनेच्या दिवशी एक महिला आपल्या मुलीसोबत सिद्धेश्ववर मठात पोहोचली. रात्री उशीरा एका गावकऱ्याला स्वामीजींच्या खोलीत महिला आणि तिची मुलगी दिसली. त्याने ही माहिती गावकऱ्यांमध्ये पसरवली. गावातील लोकांनी तातडीने मठाच्या दिशेनं धाव घेतली. ग्रामस्थांनी मठाचा दरवाजा तोडत स्वामीजींना याचा जाब विचारला. तसेच महिला आणि लेकीजवळ घेराव घातला. त्यांच्यासोबत असभ्य वर्तन केलं.

यावेळी मोठ्या संख्येनं ग्रामस्थांनी धाव घेतल्यामुळे खोलीत असलेली महिला आणि मुलगी प्रचंड घाबरली. यादरम्यान, काहींनी व्हिडिओ शूट करून शेअर केला. मठाजवळ मोठ्या प्रमाणात ग्रामस्थ जमा झाल्यामुळे पोलिसांनी तातडीने घटनास्थळी धाव घेतली. तसेच गावकऱ्यांना शांत करण्याचा प्रयत्न केला. यावेळी स्वामीजींनी, आपण कोणतंही चुकीचं काम केलं नसल्याचं सांगितलं. महिला आणि मुलगी दूर गावावरून आले असल्यामुळे त्यांना मठात आश्रय दिला असल्याचं त्यांनी सांगितलं.

या घटनेनंतर पोलिसांनी महिला आणि तिच्या लेकीला सांत्वन केंद्रात हलवले. दुसऱ्या दिवशी स्वामी आणि ग्रामस्थांमध्ये बैठक पार पडली. या बैठकीस ग्रामस्थांनी स्वामींना मठ सोडून जाण्यास सांगितले. अखेर ग्रामस्थांचा रोष पाहून स्वामींनी मठ सोडल्याची माहिती समोर आली आहे.