बीडमध्ये गुन्हेगारी घटनांमध्ये वाढ होत असल्याचं चित्र आहे. अशातच धारूर तालुक्यातील एका घटनेमुळे परिसरात खळबळ उडाली आहे. अल्पवयीन मुलीचे लग्न लावून दिल्यानंतर आईनं जावयासोबत अनैतिक संबंध ठेवल्याचा धक्कादायक प्रकार समोर आला आहे. अल्पवयीन मुलगी सातवीच्या वर्गात शिकत होती. तिच्या मनाविरूद्ध लग्न लावून दिलं. नंतर आईनं केलेला हा प्रकार उघडकीस आला. या प्रकरणी पीडितेनं पोलीस ठाण्यात तक्रार दाखल केली आहे.

मिळालेल्या माहितीनुसार, अल्पवयीन मुलगी दोन लहान बहिणी आणि आईसोबत बीडच्या धारूर तालुक्यातील गावात वास्तव्यास आहे. २०१६ साली त्यांचे वडील घर सोडून गेले होते. २०१७ साली इयत्ता सातवीत शिकत असलेल्या मुलीचे लग्न झाले. मुलीच्या आईनं गावातीलच एका तरूणासोबत तिचे लग्न लावून दिले. गावातीलच एका मंदिरात तिच्या आईनं मुलीचे लग्न लावून दिले.

या लग्नाला मुलीचा विरोध होता. मात्र, तरीही जबरदस्तीनं मनाविरूद्ध लग्न लावून दिलं. इच्छा नसतानाही आई, मावशी, चुलत दीर, सासू, चुलत सासरा आणि चुलत सासूनं लग्न लावून दिल्याची तक्रार पीडितेनं पोलीस ठाण्यात केली. नंतर तिला सासरी नांदायला पाठवले. पतीनं इच्छेविरोधात शारीरिक संबंध ठेवले.

यानंतर आई आणि सासूला याची माहिती दिली. मात्र, त्यांनी बळजबरी केली. नंतर मुलीसमोर धक्कादायक बाब समोर आली. तिनं आई आणि नवऱ्याचे अनैतिक संबंध पाहिले. यामुळे तिला मानसिक धक्का बसला. मात्र, यानंतर नवऱ्यानं आणि तिच्या आईनं अल्पवयीन मुलीला त्रास देण्याल सुरूवात केली. 'तू आम्हाला बदनाम करतेयस', असं म्हणत दोघांनी मिळून मुलीला मानसिक त्रास देण्यास सुरूवात केली.

यानंतर २०२२ साली अल्पवयीन मुलगी आजी आजोबांकडे गेली. तरीही आई आणि नवऱ्याचा त्रास सुरू होता. तिनं अखेर १७ एप्रिल २०२२ साली मानवलोक सेवाभावी संस्थेत जात हकीकत सांगितली. १८ एप्रिल २०२२ रोजी अश्विनी जगताप यांनी तिला बाल कल्याण समितीत हजर केले.समितीच्या आदेशानुसार, तिला सावित्रीबाई फुले मुलींच्या बालगृहात पाठवण्यात आले.

या प्रकरणात चार वर्षानंतर गुन्हा दाखल करण्यात आला.या प्रकरणानंतर परिसरात खळबळ उडाली आहे.